Nongpoh, Nailur 29: Da ka mynsiem jong ka jingsarong hadien ka jingïaid lynti kaba 50 snem ha kaba kyntiew ïa ka jingnang jingstad ki heprit bad ki khun samla ka thaiñ, ka San Raid Secondary School Umlaper ha ka sngi Thohdieng jong ka taiew baladep ka la rakhe ïa ka Jubili Ksiar, ha kaba la ïashim bynta da u MP ka Shillong u Dr. Ricky A.J Syngkong kum u kongsan ban pynphuh pynphieng ïa katei ka jingrakhe ïa ka Jubili Ksiar.
Kane ka San Raid Secondary School, Umlaper ka dei kaba la seng da u Deputy Speaker barim ka jylla u Bah P.W Muktieh ha ka snem 1974 bad ha kane ka skul ki hap haduh san tylli ki Raid ba kynthup ïa ka Raid Nongkhap, Raid Maiong, Raid Makdoh, Raid Amjong bad ka Raid Lymphuid ha Ri Bhoi District.
La sakhi lang ruh ha kane ka sngi da ka jingdon lang u Bah P.W Muktieh kum u nongseng ïa ka Skul, u MDC barim ka Mawhati u Bah Otril Pamshong, u Bah Tlaswell Dorphang, khynnah skul barim, bad kynthup ruh ki bahaing hasem jong u Bah P.W Muktieh. La ai mynsiem ruh ha kane ka sngi da ka jingdon lang ki khynnah skul, ki nonghikai bad ki riew rangbah jong ka Shnong Umlaper bad kiwei kiwei.
Haba kren kum u kongsan ha kane ka sngi, u MP ka Shillong u Dr. Ricky A.J Syngkon u la pynpaw ïa ka jingkmen kaba khraw ban ioh shim bynta ha kaba rakhe ïa ka jingïaid lynti ba 50 snem jong kane ka skul bad ha kajuh ka por u la ai jingïaroh ïa u Bah P.W Muktieh kum u riew rangbah uba la iohi jngai ban sengi a kane ka skul, kaba la ai ka jingshakri ïa ki Heprit bad ki khun samla katei ka thaiñ bad kaba lah ruh ban ong ba ha kitei ki snem ka pule ka puthi kam pat da ioh lad ban suhthied ha katei ka thaiñ.
Ha kajuh ka por u la ai mynsiem ruh ïa ki bor pynïaid skul bad kynthup ïa ki nonghikai ba kin dang shim ïa ka jingkitkhlieh ban kyntiew ïa katei ka skul, namar ka jingdon katei ka skul ka dei ban pynmih ïa u soh bathiang ban mih bun ki riew khraw kiba long kita ki nongkit nongbah ïa ka imlang ka sahlang bad ha ka jylla hi baroh kawei.
Kiwei kiwei ba la ai jingkren ha katei ka sngi ki kynthup ïa u Bah Otril Pamshong, MDC barim ka Mawhati uba dei ruh kajuh ka por kum u Nonghikai barim, u Bah Tlaswel Dorphang, kum u khynnah skul barim jong katei ka skul bad naka longîng jong U Nongseng ïaka skul la kren da ka Kong Beautiful Dorphang, iba dei u lok jong u Bah PW Muktieh.
