Shillong, Nailur 28: Ïa ka Northeast Conclave kaba la shisngi la pynlong da ka Meghalaya State Rural Livelihoods Society (MSRLS) hapoh ka jingïatreilang bad ka The/Nudge Institute, Bangalore. Ka phang jong kane ka Conclave ka long ban pynkhlaiñ ïa ka ecosystem na ka bynta ki kam pynroi na ka bynta ki nongshong shnong, kaba kynthup ruh ïa ka State Rural Livelihood Mission (SRLM) jong ki North-East State, ha kaba ha kane ka prokram la donlang ki riewshemphang, ki samla pule, ki nongthaw aiñ, ki nongtrei ha ka imlang sahlang.
Ha kane ka prokram la thang ïa ka sharak da u Charanjit Singh, IFS, Add. Secretary ka Ministry of Rural Development Govt. of India kum u kongsan bad u A.T Mondal, Myntri ka tnat Bording, Community & Rural Development, ka sorkar Meghalaya nalor kiwei kiba la shah khot sngewbha kiba kynthup ïa u B Rajsekhar, IAS, Spl. Chief Secretary, Govt. of Andhra Pradesh, u Sampath Kumar, IAS, Development Commissioner bad Principal Secretary, ka Meghalaya bad ki nongmihkhmat ka NRLM na ki jylla kum ka Assam, Tripura, Manipur, Bihar bad Jharkhand.
U A.T Mondal, Minister C&RD haba kren u la batai ba ki don bun ki lad ki lynti ban kyntiew ïa ka ïoh ka kot ïa ki shnong nongkyndong da kaba ai nuksa ïa ka shnong Khweng ha Ri-Bhoi kiba ju thaiñ jaiñ bad kiba sengkam la jong katkum ka juk ki longshwa manshwa bad kiba la ïatreilang ruh bad ka USHA International Ltd. ban lah ban pynmih bun bad ban ïoh ruh ka kamai kaba biang. U la kren ruh shaphang ki women Self Help Group (SHG) movement kiba la sdang ïa ki kam bapher bapher ha ka jylla hadien u snem 2018.
