Shillong, Nailur, 27: Ki Pulit ka East Khasi Hills District ki la ïohkem ïa uwei u bar jylla uba la tip kyrteng kum u Ibrahim Ansari, 59 snem ka rta na ka shnong Senha, Muslim Mohalla, Lohardaga District jong ka Jylla Jharkhand halor ka jingkam ïalade kum u Assistant Area Manager ka KFC bad ban shukor bad ban pynngop ïa uwei nongujor uba la siew ïa ka pisa haduh T. 19,27,00 lak na ka bynta ka Investment/Bussiness Plan.
U Superintendent of Police ka East Khasi Hills u Bah S Nongtnger ha u kyrwoh ba la phah sha ki lad pathai khubor u la pyntip ba ki Pulit jong ka Rynjah Police Station ki la ïohpdiang ïa ka ejahar ha ka 21 tarik Nailar 2024 ba don uwei u briew uba ai kyrteng kum u Abhishek Kumar Yadav, uba kam ïalade kum u Area Manager ka KFC, u la tyrwa ïa ka Investment Plan/Scheme kaba kot haduh T.19,27,000 lak.
U SP u la ïathuh ba u nongujor u la shah pynngop ha kane ka scheme ba ka dei kaba shisha bad u la siew ïa ka installment ba nyngkong ha ka 14 tarik Jylliew, 2024 bad bteng sa kiwei kiwei ki jingsiew ha ki taiew kiba bud bad ka pisa Installment kaba khatduh kaba u la siew ka dei ha ka 6 tarik Nailar 2024. U Nongujor u la pyntip ba dei hadien ka jingpynslem, ba u la shem ba u Abhishek um don jingïadei satia bad ka KFC bad sngewthuh ruh ba u la shah shukor.
Ki Pulit ki la register ïa ka case halor kane ka jingjia bad ha ka jingtohkit ki la ïohkem ïa u Ibrahim Ansari. Ka jingtohkit pyrshah ïa u Ibrahim Ansari mynta ka dang ïaid shakhmat ban lapdien sa ïa kiwei pat ki briew kiba donkti lang ha kane ka kam thok kam shukor.
