Shillong, Nailur 26: U Jagadguru Shankaracharya Swami Shri Avimukteshwaranand Saraswati uba la poi ha ka jylla Arunachal Pradesh ha ka sngi Palei u la shah pynphai kylla ha ki bor synshar na ka daw ka jingpyrshah ïa ka Gau Dhwaj Sthapana Bharat Yatra.
Une u nongïalam ka niam Hindi uba la wan poi ha Donyi Polo Airport ha Hollongi lyngba ka liengsuiñ u la ïakynduh pynban ïa ki dkhot ba pyrshah jong ka All Arunachal Pradesh Students Union (AAPSU).
Ki nongïalam ka AAPSU ki la maham ba kam dei ban don kano kano ka jingkhanglad ïa ki riewlum ha ka bam ka dih da kaba ong, “phi lah ban leit ïalap sha kano kano ka jaka ba phi kwah hynrei ym hangne. Ngim pyrshah, hynrei ngim kwah ban jia eiei hangne.”
Ha Nagaland u Swami Avimukteshwaranand Saraswati u la shah khang ha ki bor synshar ban rung shapoh ka jylla da ka Sorkar Nagland
“Ngam shym la pynmong ïano ïano ruh ne ngam shym la kren sniew ïano ïano ruh. Nga wan tang ban ai ïa ka khubor sha ki paidbah. Balei ki khanglad ïa nga? la buh jingkylli u Swami Avimukteshwaranand.
U la kyntu ïa ki Myntri Rangbah jong ki Jylla ka thaiñ Shatei Lammihngi ban ym khang ïa ka lynti ïaid jong u hynrei ban khot sha ka jingïakren ha kaba ïadei bad ka jingkhang shohdoh bad ban ïada ïa ki masi.
Ha Sikkim, u Swami Avimukteshwaranand ula shah pdiang sngewbha ha ki paidbah bad u la ïohlad ban ïalap ïa ka khubor ban ñiewkor ïa ka masi kum ka kmie.
U Swami Avimukteshwaranand u la pynbna ban sa wan iuhkjat ruh ha nongbah Shillong ha ka 2 tarik, Risaw, halor kane kajuh ka jingthmu ban pynlong ïa ka jingïaid Yatra kat haduh ba ka la mih ka jingpyrshah kaba jur na kiba bun ki kynhun bapher baher ka Jylla.
U Myntri Rangbah ka Jylla u Conrad K. Sangma u la thet kti da kaba khynñiat beit sha ki bor synshar district ban ai lane ban ym ai jingbit ïa kane ka jingpynbna ban ïaid Yatra.
Ka HYC dang shen ka la rah plakad hakhmat ka Shillong Press Club (SPC) ban pyrshah ïa ka kynhun niam Hindu ban pynlong ïa ka jingïalang bad ki lad pathai khubor na ka bynta ban pynbna ïa ka jingïaid Yatra ka ban sa long ha ka 2 tarik Risaw, 2024.
