Shillong, Nailur 23: Ka Hynñiewtrep National Youth Front Langïong Tyrsad Circle ha ka sngi Nyngkong ka la hiar jurip ïa ka Surok Mawphlang Weiloi hadien ba ia kane ka surok na ka liang ka sorkar haduh mynta ka dang pynsah teng ban maramot.
Ha kaba ïadei bad kane hadien ba la dep ban jurip haba kren sha ki lad pathai khubor na ka liang u President ka HNYF Langïong Tyrsad Circle u Bah Winsonwell Kharryngki u la ong ka jingwan jurip jong ki ka dei hadien ba ka mariang ka la ailad ban sdang trei biang ïa kane ka Surok bad ban peit haduh katno ka kam ka la dep.
Halor kane na ka liang ka seng ka kyntu ïa ki contractor ban sdang biang ban pyntrei namar ka bneng ruh ka la ailad bad ban pynkloi noh ban siang ïa ka Surok naba ka surok kadei ka kam kaba donkam bha da ki paidbah.
Shuh shuh halor kane na ka liang utei u nongïalam u la ong ba ki paidbah ha ka por lyuir ki la shah shitom ïa ka jingsniew ka Surok, hynrei mynta ka bneng ka la ailad ban kyntu ïa ki ban sdang noh biang ïa ka jingtrei khnang ba ki paidbah ka thaiñ kin suk ha ka leit ka wan.
Na ka liang jong u, u la ong ruh ba ki don ki jaka kiba la sniew biang wat la ki la dep siang rong bad kine ki contractor ki dei ruh ban long kiba kloi ban siang biang ha kito ki jaka kiba la sniew.
