Ha ka Graduation Ceremony 2024 pynkup burom ka Jaiñtia Eastern College ia ki samla pule

Khliehriat, Nailur, 20: Ha ka rukom kaba i phuh i phieng bha ki bor pyniaid jong ka Jaiñtia eastern College Khliehriat lyngba u Principal u Dr Phervision Nongtdu mynta ka sngi la pynlong ïa ka prokram pynkup burom ne ka Graduation Ceremony ka jingpynkup burom (convocation) ïa ki khynnah kiba la pyndep ïa ki jingpule ha ki kyrdan Undergratuate bad Post Graduate bad kumjuh ruh la ai ki khunsam bapher bapher.
Ha kane ka prokram u Deputy Commissioner ka East Jaiñtia Hills District, u Shivansh Sawasthi, IAS u la long kum u kongsan uba la shim ruh ïa ka bynta ha kaba pynkup burom (convocation) ïa ki khynnah pule jong katei ka college.
Haba kren kum u kongsan, u Shivansh Awasthi, u la kyntu ba pynshlur ia ki samla pule ha ki kam kum ki skill development ha kaba ki don ruh ki nonghikai, ki samla ki ba lah ban shim ïa ka synjam, kumjuh ruh u kyntu ba donkam ban pyndonakam hok ïa ki social media ban kyntiew ïa ki sap ki phong, dei ruh ban pyrkhat ïa kiwei kiwei ki kam ruh kum ha ki kam jngohkai pyrthei, ki kam kiba pynmih jingbam (Food processing centre) bad kiwei kiwei ki jait kam, “Ngi donkam ïa ki samla kiba na ka thaiñ ki ban mih sha khmat ban shim ïa ki lad ki kabu ban kyntiew ha ki kam ki jam ban ieng hala ki jong ki kjat ha kaba ynda la dep pyndep ïa ki jingshah hikai kin ioh jingiarap ruh na ki tnat bapher baher ha kaba ki la don ki nonghikai, ki bor district kiba lah ban lam lynti ïa ka kam bad ban ai jingmut ban sdang ïa ki kam ki jam” ong u Deputy Commissioner.
U pynshlur bad ai mynsiem ruh ba haba leit shabar dei ban long ruh kum ki nongrah ktien jong ka college bad ong ruh ba kane ka jingpynkup burom ka dei tang ka jingsdang bad u la iathuh ruh ïa ka jingiaid lynti jong u ha ki por ba u dang long kum u samla pule bad ong ruh ba ym dei ban sngew hun tang ha kaei kaba phi la ioh jingtip na ka college namar ka college hi ka dei tang ka shlem ka ban lam lynti hynrei donkam ban trei shitom na lade ruh da kaba wad jingtip shuh shuh na ki Internet na ki social media.
U Principal jong ka jaintia Eastern College, u Dr P. Nongtdu, u la ong ba kawei na ki jingthmu ba kongsan jong kane ka college ka long ruh ban ai jinghikai ïa ki samla kiba dang iakhun ban wad ïa ki kam ki jam bad ruh ban ïakhun ban tehlakam ïa ki kam sniew kum u drok bad kiwei kiwei ki kam sniew ki ba ktah ïa ka met ka phad, ïa ka koit ka khiah, u la bynrap ruh da kaba ong ba “Da kane ka jingsdang kaba rit ngin sa lah ban jam shuh shuh shakhmat bad ha kane ka shelm ai jinghikai ha college la sdang ruh ïa ka Desktop Publishing (DTP) bad la don haduh sanphew ngut ki khynnah kiba pule ïa kane ka DTP ha college, ka college ka don ruh ka jingthmu ban khot lang ruh ïa kito ki khynnah kiba la dep ïa ka klas X kalas XII ha kane ka jingpule ïa ka DTP ha college, namar ha Jaiñtia Eastern College Khliehriat mynta ka la sdang ban ai jinghikai ha baroh ar liang, kata ka General Education bad ka Skill Education”
Ha kane ka sngi, ba pynkupburom ki la don haduh 137 ngut ki khynnah kiba la shah pynkup burom ne ioh pdiang ïa ka convocation bad ki la don ruh ki khynnah pule kiba na ka kyrdan Undergraduate bad Postgraduate kiba ioh khur ïa ki khusam ba kyrpang ha kaba ïa ka khusnam Best Academic Excellence Award la khur da ka samla Evakordor na ka Department of Commerce, ka samla Iukini Shadap, Department of Khasi bad ka samla Triyowanbiang Suja, Department of Sociology, kiba na ka kyrdan Undergraduate.
Kiwei pat kba la ioh khur ïa ka khusnam Best Academic Award, kiba na ka kyrdan Post Graduate ki kynthp ki kynthup ka samla Beronika Tangliang, kaba na ka Department of Education, ka samla Dakanihipaia Pothmi, kaba na ka Khasi Department.
Kiwei pat kiba la ioh khur ïa ka khusnam Best Volunteer Award NSS/NCC/RRC ki kynthup ka samla Rikis Shadap, ka Iukini Shadap, Pynhunlang Sutong, u samla Babidol Bareh, ka Kyrmenla Pala.
Kiba ioh khur ïa ka khusnam Students of the Year ki dei ka samla Bironika Tangliang, na ka kyrdan Post Graduate bad ka samla Iukini Shadap na ka kyrdan Undergraduate.
Kiba la ïa don ryngkat ha kane ka prokram mynta ka sngi, ki kynthup ruh u President Governing Body Jaintia Eastern College Khliehriat, u Rev F.S.Rymbai, u Vice President jong ka Green Valliey Industries Limited Nongsning East Jaintia Hills District, u Pawan Kumar Joshi, ki Profesor kiba na ki shnat pule ne Head Department bapher bapher jong ka Jaiñtia Eastern College Khliehriat.