Pynkut noh ïa ka drama politik,ong ka Myntri ïa ka kynhun shit niam khang bam doh masi ki Hindu

Shillong, Nailur 17: Ka Myntri ka sorkar jylla kaba khmih ia ka tnat ka koit ka khiah ka Kong Ampareen Lyngdoh, ka la kyntu ïa ka kynhun niam Hindu ba kan pynkut noh ïa ka drama politic da kaba pynbna ba ka masi kadei ka kmie jong ka ri India ne ka Mother of India bad ban khang noh ïa ka jingshoh doh ïa ki masi.
Ha kajuh ka por ka la kyntu ba dei ban don ïa ka jingïaburom mar kylliang hapdeng ki jaidbynriew bad ka la kyntu ïa kawei pa kawei ka kynhun ba ki dei ban burom ïa ka riti tynrai bad ïa ka jingngeit ka jong ki kumba ki burom ïa la ka jong, khnang ba ka ri India kan neh kum kata ka ri synshar paidbah kaba khlaiñ.
Ka Jagatguru Shankaracharya Swami Avimukteshwarananda Saraswati ka la tyrwa ban pynlong ïa ka jingïaid paidbah ban ïada ïa ka masi ha nongbah Shillong ha ka 2 tarik u Risaw, kaba la mih ka jingpyrshah na kiba bun ki liang ha ka jylla Meghalaya.
Haba iadei bad kane ka jingkyrpad jong kane ka kynhun Hindu ban pynlong ïa ka Yatra, ka Kong Ampareen ka la ong ba ka Meghalaya ka don ïa la ka jong ka kolshor kaba kyrpang bad kumta ym dei ban ailad ba ki bor kiba nabar ba kin wan ban tuklar.
Ka la byrngem ba kano kano ka jingleh ne ki jingthmu ban pynthud ïa ka suk ka saiñ ka dei kaba ym lah ban pdiang bad ki la don lypa ki aiñ ki ban shimkhia ïa kum kitei ki jingpynthud.
Na ka liang ka Myntri ka la ong ba ka Meghalaya ka dei ka jylla kaba shongsuk kaba don ïa la ka jong ka kolshor bad ka riti dustur tynrai bad kano kano ka jingthmu ban pynpait pynpra ne pynïashun dei ban tehlakam namar kine ki drama politik ym dei ban ailad ban ktah ïa ka shongsuk jong ki paidbah ka jylla Meghalaya.