Ki briew kiba ïalap kheiñ kmie ïa ka masi dei ki biej bad ki kynhun lehnoh ong u Myntri Sorkar

By Mawphor News Desk On Sep 17, 2024

Shillong, Nailur 16: Ka mat khang ïaid Yatra ki Hindu ka la nang khluid katba dang mih ki sngi ha kaba ha kane ka kynti kaba mynta na ka liang u Myntri ka tnad pule puthi Rakkam A Sangma, u la kynthoh jur ïa ka kynhun Hindu kaba ïalap ban khang bam doh masi bad ban kheiñ kmie ïa kane ka mrad ha India kum ka kynhun ki ‘biej’ bad ai jingmut ba dei ban kheiñ ïa ki kum ki “kynhun lehnoh.”
Ha kaba iadei bad kane haba ïakren bad ki nongthoh khubor ha ka sngi nyngkong, u Rakkam u la ban jur ba kine ki briew ki dei kiba duna ha ka jingsngewthuh shaphang ka jingsynshar jong ka India, ka jingpher jong ka kolshor, bad ka hok katkum ka riti synshar ban long laitluid ha ka niam.
“Dei ban ñiew ïa kine ki briew kum ki lehnoh bad ki bym ibit ban shah khot ki Hindu,” ong u Rakkam. Na ka liang jong u ula kyntu ruh ïa kiba kin pule bad sngewthuh ïa ka riti synshar ka ri India, namar ki kam ba ki leh ki pyni ïa ka jingbym biang ban shah kheiñ kum ki nong India ba shisha ha kane ka ri kaba laitluid.
U Sangma u la pynpaw ba ka doh masi ka long ka jingbam ba sngewtynnad bha ban ïabam ha Meghalaya, bad u la kynthoh ïa kino kino ki jingpyrshang ban pynïadei ïa ka jingbam doh masi bad ka jingbat niam. “Ym don mano mano ba don ka hok ban pynbor ïa kaei kaba kiwei ki dei ban bam,” u la bynrap.
U Myntri u la kdew ruh ïa ka jingïatai ha Parliament ha u snem 1987 ha kaba u Late P.A. U Sangma, MP barim jong ka Tura, u la ïada ïa ka hok ban bam katba mon ha India, da kaba ban jur ïa ka jingdonkam ban burom ïa ki rukom im bapher bapher jong ki nongshong shnong ka Ri baroh kawei.
Ka sorkar Meghalaya ka la mad ïa ka jingpynbor na baroh ki bynta jong ka imlang sahlang ban nym ai kano kano ka jingbit na ka bynta ka “Gau Dhwaj Yatra” ba la tyrwa da u Gau Pratishtha Andolan (GPA), ka jingïakhih kaba thmu ban khanglad ïa ka jingpynïap masi bad ban ñiew ïa ka masi sha ka kyrdan “ka kmie”.
Lah ban ong ba ïa kane ka Yatra la buh ban pynlong ha ka 2 tarik u Risaw ha Nongbah Shillong da katei ka seng ki shit niam Hindu.
“Lada phi pyrkhat ba phi dei ki Hindu, long kum ki Hindu, lada phi dei ki khristan long kum ki Khristan. Ngi dei ban ïalap ïa kaba ngi leh kaba ym dei ban pynmong ïa ka jingsngew jong kiwei ki kynhun. Ngi dei ka ri kaba synshar paidbah, kaba la pynwandur kyrpang kumta kum kine ki jingpynphiah ïa ki nongshong shnong kam dei ban wanjia,” u la ong.