5538.246 kg u ganja bad 5702.78 grams u drok heroin kurup ki pulit Ri-Bhoi hapoh 4 snem

Nongpoh, Nailur 16: Ka jingjyllei u drok ha Ri-Bhoi District kaba dei ka khyrdop ban rung bad mih naka jylla kala long kaba shyrkhei katba nangmih ki sngi watla ka tnad pulit lyngba ka Anti Narcotic Task Force (ANTF) kala trei shitom bad pynlong ki jingkhynra bad ki jingtalasi naka por shaka por.
Haba kren sha ki lad pathai khubor naka liang u Bah Banraplang Jyrwa Addl Superintendent of Police ka Ri-Bhoi District u la pyntip ba tang haki 4 snem kata naduh u snem 2021 haduh mynta ka tnad pulit lyngba ka ANTF kala ioh ban kurup haduh 5538.246 kg u Ganja bad 5702.78 grams u drok heroin bad naka liang ki bor pulit kim shym la shongthaid bad shongkli kti ban ïakhun ïa u drok ha Ri-Bhoi kaba dei ka khyrdop jong ka jylla.
U la ïathuh ruh ba ha kine ki 4 snem ka jingioh kurup drok ka long 338.738 kg of ganja bad 476.4 grams u drok heroin ha u snem 2021, 205.198 kg u ganja bad 3,098.75 grams u drok heroin ha u snem 2022, 31.01 kg u ganja bad 1,965.03 grams u heroin ha u snem 2023 bad ha u snem 2024 la ioh kurup 4,963.3 kg u ganja bad 162.6 grams u drok heroin.
U Bah Banrap u la pyntip ruh khnang ban lah ban tehlakam ïaka jingïakhun pyrshah ïa u drok naduh ki nongshalan bad ki nongdih, ka tnad pulit kala rai ruh ban ïatreilang bad ki Dorbar Shnong, ki samla bad ruh ban pynkhlaiñ ïaki Village Defence Party, namar ban rat diengkhong ïaki kam sniew donkam ka jingtreilang bad ka jingsnohkti lang jong baroh.