Shillong, Nailur 16: U Myntri ka tnat Pule Puthi ka sorkar jylla u Rakkam A Sangma ha ka sngi nyngkong u la ong ba ka sorkar ka dang trei ïa ka kam ban ïarap ïa ki jingeh ba la mad da ki nonghikai SSA.
“Ngi dang wad ki lad ki lynti kumno ban peit ïa ki jingeh jong ki nonghikai SSA ha kine ki sngi ban wan,” ong u Sangma ïa ki lad pathai khubor. ïa kane u la jubab halor ka jingdawa jong ki nonghikai SSA ban kyntiew noh ïa ka tulop jong ki hapoh une u bnai.
U Sangma u la ong ba ka jingdawa jong ki kadei kaba shong nongrim bad ka sorkar ka dang pyrshang katba lah ban pynbiang ïa kane ka kam.
“Ha kajuh ka por ngi kyrpad ruh ïa ki ba kin long kiba ïaishah bad ka sorkar,” u la bynrap.
U Myntri u la pyntip ruh ba kham ha shwa ka jingsiew ïa ki nonghikai SSA ka long 90:10 bad mynta ka sorkar kan kyntiew noh sha ka 5% manla u snem kaba long ruh da ka jingkyntiew kaba 30:70 bad ha u snem ban wan kan long 35:65.
“Ngi sngewthuh ba ki don bun ki skul kiba ym don ka jingpynrung ïa ki khynnah pule. Ki don bun ruh ki skul ha kaba ki nonghikai kim ju leit sha ki skul. Ki don ruh ki skul kiba duna bha ki khynnah skul. Ki don ki skul kiba khlem ki jingtei kiba biang. Ki don ruh ki skul kiba bun ki nonghikai hynrei duna ki khynnah skul. Ki don ruh ki skul kiba don tang 4 ngut ki nonghikai bad tang 2 ngut ki khynnah skul. Kumta ngin phah ïa ka kynhun wad jingshisha ban ïoh ïa ki jingtip ba biang jong baroh ki nonghikai, ki skul bad ha kajuh ka por ngi dang trei borbah ban khring ïa ki nonghikai la kidei ha ka SSA, adhoc, deficit naba ngi dei na ka juh ka ïing ka sem,” u la ong.
Haba kylli, u Rakkam u la ong, “Kam don ka jingkylli kaba ong ba ngi tieng ban leh eiei. Kane kam shym wan ha ka dur ka dar. Ngi la dep ban pynkynriah ïa ki katto katne ki nonghikai ha kaba ki khynnah ki duna ban wan skul bad lada ka jingwan ki khynnah ka la kiew ngin sa phah biang ïa ki nonghikai sha kine ki skul.”
U la ong ruh ba ka sorkar kan pynshitom ïa ki nonghikai kiba phah hikai ha kiwei pat ki briew.
“Lada ngi ïoh ki jingujor ka aiñ kan shim la ka jong ka bynta. Ka tnat kan shim la ka jong ka kam halor kane ka jingeh.”
“Nga lah dei u nonghikai hynrei nga kham sngewtynnad ha ka kam saiñ pyrthei kumta nga la iehnoh ïa ka kam hikai ban pynïasoh sha ka saiñ pyrthei,” ong u Rakkam.
