Shillong, Nailur 15 : Ka Jylla ryngkat ki paidbah jong ka Nongthymmai constituency ha ka janmiet sngi U Blei ki la ai khublei khatduh ïa u CEM barim bad MDC ka Nongthymmai, Bah Latiplang Kharkongor uba la khlad noh na kane ka pyrthei ha ka 12tarik mynta u bnai ha ka rta kaba 53 snem.
Shwa ban rah ïa ka met jong u sha Lum Jingtep jong ka Balang Presbyterian Nongthymmai kaba don ha Mawblei ka la don shwa ka jinglehburom kaba khatduh ha Nongkhyriem Nongthymmai ha kaba naduh ki bahaïing ha sem, ki Kur ki Kha, na ka KHADC, ki seng bapher bapher bad kumjuh na ka Synjuk ki Nongsynshar Shnong, ki Myntri bad ki Bakhraw, ki Khlieh Nongsynshar na kylleng kumjuh ki sengsaiñ pyrthei bapher bapher ki la donlang.
Ka la don ruh ka jingpule ïa ki kyrwoh sngewlem kaba wan na ki kynhun, ki seng, ki synjuk, na ka shnong bad ruh na u Myntri Rangbah ka Jylla, Conrad K Sangma bad kiwei kiwei.
Ka la don ruh ka jingkren ba lyngkot na ka liang ki bahaïing, ki khun, na ka liang ka Kur Kharkongor kumjuh na ka liang ka Kur Wanniang kaba dei ka kur jong ka kurim u Bah Latiplang, nangta na ki sengbhalang bapher bapher bad kumjuh na ka Synjuk ki Khlieh Nongsynshar Nongthymmai bad ruh na ki nongkyrshan ba hakhmat jong utei u MDC ba la jop lynter la 20 snem.
Ïa ka jinglehniam leit ontep ha kane ka sngi la pyndep da u Pastor Nathan Diengdoh.
Kumban shu kdew hangne, u Bah Latiplang Kharkongor u la ieh noh shadien ïa ki san ngut ki khun bad kumjuh ïa ka kurim, Kong Melvina Wanniang.
Khyndiat ha ka jingkren ba lyngkot a u CEM ka KHADC ha kane ka sngi, Bah Pyniaid Sing Syiem u la pynkynmaw ruh ba dei ha ka por jong u Bah Latiplang Kharkongor kum u Executive Member ka tnad Trade, ki bar jylla ki shem jingeh ban ïoh trading license da kaba suk namar u dei u briew uba ïaid beit.
“U Bahheh Latiplang u la thaw ïa ka rekod kum u MDC shimet ba nyngkong tam ha KHADC ban bat ïa ka shuki CEM ha District Council,” bynrap shuh shuh u Bah Pynïaid.
Ha kane ka sngi u la ong ruh ba kum ka Council ka plie ka jingkhang na ka bynta ka longïing jong utei u MDC ba la khlad noh haba don kino kino ki jingeh.
Kumban shu kdew hangne, u Bah Latiplang u la jop nyngkong eh ha u snem 2004 bad naduh katei ka por u la jop lynter khlem shah rem haduh ka sngi ba un da khlad noh na kane ka pyrthei.
