Shillong, Nailur 15: Ka jingkylla ha ka saiñ pyrthei ka lah ban wan hadien ba u Nongïalam ka BJP bad MDC ka Tura Bernard N Marak ha ka sngi U Blei, ula dawa ïa ka National People’s Party (NPP) kaba don ha ka Liang Synshar, ban ailad ïa ka BJP ba kan ïalam ïa ka Executive Committee (EC) ha Garo Hills Autonomous District Council (GHADC) lada kam lah ban bat ïa ki jingkular ba la ai sha ki Nongtrei.
“Ka NPP ka dei ban ailad ïa ka BJP ba kan ïalam ha GHADC lada kam lah ban bat ïa la ka jong ka kular ba ka la khlei sha ki nongtrei,” ong u Bernard ha ka kyrwoh khubor.
Ula ong ba ka NPP ka la pynmih ïa ka jingpynbna ha u 2018 ban pyllait ïa ka tulop hapoh ka 5th Pay Commission bad naduh katei ka por bad hadien ba mynjur ïa ka mang tyngka ha ka 5th Pay Commission, ki nongtrei ki la shah thok naduh u 2018 da ka EC barim ka NPP kiba la siew ïa ka tulop da ka 4th Pay Commission.
Haba kam ba tang ka BJP kaba lah ban weng ïa ki jingbym biang ha ka rukom pyndonkam ïa ka pisa ha GHADC, u Bernard ula ong, “Ka NPP ka la pyrshang la bun snem ban kren sha Delhi halor ka GHADC ba kam lah ban treikam. Nga don ïa ki sakhi jong ki shithi ba la thoh da ki Myntri ka NPP”.
“Ka NPP ka dei ban aiti noh ïa ka GHADC sha ka BJP ba kan ïalam bad ngin pynthikna ïa ka jingskhem ka synshar khadar, ka jingkhlaiñ bad jingpynim pat ïa ka ADC hapoh ka hynriew bnai,” ula ong.
