Shillong, Nailur 15: Ki riewngeit kiba hab hapoh ka Parish Pynthorumkhrah kila ïashimbynta da ka jingshitrhem ha ka sngi rakhe ïa ka sngi burom jong ka parish, ryngkat ka pud ka tem bad kiwei kiwei ki prokram.
Ia kane ka jinglehkmen la pynlong ha ha ïing mane U Petrus bad Paulus Bakhuid da ka jingnguh Blei ha ryngkat ki paid riewngeit bad ki arngut ki Sohblei ki la pynshoh biej shuh shuh ïa ki paidbah ka jinglah jong ki ban tem da ka sap ka phong kaba ki don.
U Lyngdoh Sohblei u phadar Alister Marweiñ u la tem ïa ka jingtem Saxaphone bad ïa ka Acordian la tem da u phadar Laurence Nongkseh ha ka jingrwai “How Great Thou Art” ha kaba ki paidbah riewngeit ki la shah skhor ïa ki jingrwai.
Lehse ka dei ka sien ba nyngkong ïa ka shnat niam Pynthorumkhrah ban rakhe kyrpang kum ka Shnat Niam hadien ba ka Sub District S Mawpdang ka la ïoh kum ka Shnat Niam thymmai bad ka khlad noh na Pynthorumkhrah.
Ka Pynthorumkhrah mynta ka don sa tang 6 tylli ki CMC ïa kaba kam ba ju ïoh bynta ki Sub District ne ki balang shnong ka hap pyndap hi. Haba kynmaw ka Shnat Niam Pynthorumkhrah ka dei ka Shnat Niam kaba roi sted bha ha Jylla Niam Bah Shillong haba ki paid U Blei bad ki Lyngdoh Nongsharai ki ïatreilang.
Shuh shuh ka khubor kaba sngew tynnad ka long ba ki Lyngdoh Nongsharai kim khuslai ïa ka kam mynsiem ki paid u Blei naba ki tip ïa ka kamram khristan. Ha jingleh burom jong ka shnat Niam Pynthorumkhrah ka long kaba riewspah bha namar ka Balang ka Saiñ dur lypa ïa kam lehniam bad lehkmen katkum ka jingdawa jong ka por.
