Shillong, Nailur 15: Ka khubor ba la ïoh na ki pulit la ïathuh ba ha ka 10 tarik mynta u bnai ha ka por kumba 1.16 baje mynstep, arngut ki briew ba la ithuh kyrteng da Ricky Tangsang ba la 26 snem ka rta bad u Mustafa Lyngdoh ba la 32 snem ka rta kiba shong ha kawei ka Maruti Alto car kaba don u nombar AS-01FN-4202 ki la pynsangeh ïa kawei ka Bolero camper ba la ñiah da u Abu Sadek ha Shangbangla bad ki la ktah kti ïa u nongñiah bad uwei uba shong hapoh ka Bolero camper uba kyrteng u Md. Dildar Hussain bad ha kane ka jingjia ki la knieh ïa ka mobile phone jong ki bad kumjuh ka pisa na ki.
Ha kaba ïadei bad kane ka jingjia na ka liang jong ki pulit ki la ïoh ban khang kdong ïa katei ka Maruti Alto car ha ryngkat bad kitei ki arngut kiba la shah kynnoh ha Nongpoh (RB). Shuh shuh ha kaba ïadei bad kane ka jingjia na ka liang jong ki pulit ki la ïoh ruh ban bat sa arngut ki briew kiba la ithuh kyrteng da u Kyrshanbor Marweiñ ba la 22 snem ka rta bad u Shem Warjri ba la 27 snem ka rta ha ryngkat bad ka kawei ka Maruti Baleno vehicle kaba ym don ïa ka number plate.
Ha kawei pat ka jingjia ki pulit ki la ïathuh ba ka Martha A Sangma ka la phah ka jingujor ba ha ka 10 tarik mynta u bnai ha ka por kumba 1.30 baje mynstep ki runar bym lah ban ithuh ki la tuh ïa ka mobile phone bad ka pisa kumba T. 400/- napoh ka ïing jong ka kaba ha Rengsipara, Dalu, West Garo Hills District (WGH).
