Ka sorkar jylla, ka don ha ka jingai jingïaroh dalade bad ïalade, ha ki sngi ba ladep, da kaba ka pyni, ba ka jingsiew khajna lane ka Goods and Service Tax (GST), ka la kiew ha u snem 2023-24, ha kaba ka la ïoh lum T.1,723klur bad katei ka kiew, na ka T.1,118 ha u snem 2021-2022.
Kane ka jingai jingïaroh, ka pyn pyrkhat ïa uba bun, ba katei ka jinglum pisa, ka wan na kaei ka thymmei bad la ka wan na ki riew paidbah ne ka dei kaba shna hi ka sorkar, na kaba wan na shabar ri, na ki ram bapher bad kumta ter ter; hynrei ka jingshisha, ka long ba ka khajna GST, ka dei kaba lum na u paidlang ka jylla bad katei ka kynthup ïa baroh ki jingthied bad ki jingdie, kiba la shah ot ha katei ka khajna, ha ki dor bapher bapher, kiba sdang naduh ka jingkheiñ kaba 5 percent, don kiba poi sha ka 12 percent, 18 percent bad ter ter.
Ka mat jong ka GST, ka dei kaba jrong bha ban ïatai, hynrei kane ka khajna, ka dei kaba la shu pynbor ïa kiba bun ki nongkhaïi ha kine ki sngi bad ba ka sorkar jylla, kam shym la thawlad ban ïarap ïa kiba trei kam lajong, hynrei ka kwah beit ban lum tang ïa ka khajna, wat haduh ba ki nongsiew, kin hap ban shim da ka ram ka shah.
Ka nuksa kaba shai bha, halor ka jingthombor ïa ki paidbah, ka dei halor ka khajna kaba 5 percent ïa u khaw byrni bad ki nongthied khaw, kiba don da ki lak ngut ha ka shisngi, ki hap siew tam 5 percent, ïa ka bai khaw sha u kharkaïa bad katei ka pisa, ka shu leit sha ka pla jong u kaïa, namar ba ki nongthied kim don ïa ka GST account bad kumta u nongdie, um lah ban shna bill.
Ki bun bah ki jingdie bad ki jingthied, kiba la khñiot na u paidbah ha kane ka dur, ba kynthup ïa ka jingpruid, ïa ki jingbam bapher, ki dawai, ki biskit bad kitei kiba shu ïoh bam jem ki nongdie, namar ba ki paidbah, kim don account, ba kin shna bill bad ba kin thep ïa katei ka pisa kaba ki kheiñ tam.
Nangta ki nongdie, haba ki la pyllait ïa ka mar na kti jongki, ki hap ban shna bill bad mar ïa shna bill, ki la hap siew GST, wat la kim tip satia, lano kin ïoh sha lade ïa katei ka pisa ba ki die jingdie, khamtam, lada dei sha ki tnat sorkar, ha kaba ka shim por, da ki bun bun snem.
Kam dei tang kata, sa kito kiba don GST account, kin hap ban pyni man u bnai, ïa ki jingkheiñ jingdiah bad katei ka ktah ïa ka jinglut jingsep, namar ba ka dei kaba hap siew sha kito kiba ju trei ïa ka kam.
Haba ka sorkar Meghalaya, ka pyni ïa ka jingkiew jong ka GST, ka la dei ruh ban pyni, ïa ka jingkiew jong ka Gross Domestic Product (GDP) lane ka jingpynmih ïa ki mar ki mata bad ha kajuh ka por, ka dei ruh ban ai lang bad ka per capita income lane ka jingïoh kamai jong u briew shimet bad kitei kin lah ban pyni ba ka jingïoh kamai lane ka jingpynmih ïa ki tiar ki tar, ka kiew shisha ha ki snem ba la dep bad kumta ka GST, ka dei hok ban kiew; hynrei lada uba thied nar rod, uba thied dewbilat ban pyntrei ïa ka surok, ula siew lypa ïa ka GST bad un sa ïoh ïa ka bai trei jong u, ynda ula dep pura ïa kam kaba lah ban shimpor, ar lane lai snem bad katei kan dei ka jingknieh noh ïa ka pla jong u briew shimet, na bynta ka jingdonkam pisa palat jong ka sorkar bad ka wan hangne, ba ka sorkar te kan nang khie spah, katba u riew paidbah, un sa nang shah kit ram.
