Shillong, Jylliew 1 : Ka Special Investication Team (SIT) mynta ka Sngi Balang ka la lap ïa ka tari ba la suba pyndonkam da u kpa ban ot ryndang ne siah pdot ïa ki arngut ki khun ha ka lawbniap Wahktieh, Nongrah.
ïa ka SIT ba la khlieh da u DSP (Crime) bad peit pat nadong shadong da u SP (City) la thaw hadien ba la ujor ejahar halor ka jingshah pyniap ki arngut ki khyllung shipara. Halor kane ka jingjia hynnin hi ka sngi ki pulit ka SIT ki la kem ïa u Jefferson Jana uba dei u kpa jong kitei ki khynnah rit iwei iba dang saw snem bad iwei iba dang arsnem.
La pynngat ïa u ha ka kyndon aiñ 364 bad 302 IPC kaba dei ka kyndon rahbor bad pyniap briew.
Haba ïakren bad ki nongthoh khubor u SP(City) bah Vivek Syiem ula ïathuh ba ki pulit ki la leit sha katei ka jaka ba jia ka jingshah pyniap kitei ki arngut ki heprit shi para mynta ka sngi bad ha ka jingïalam jong u Jana ki la lap ïa ka tari ba ula pyndonkam ban ot ne siah ïa ki ryndang jong ki khun jongu.
U la ïathuh ba ïa une u runar yn sa ïalam hakhmat ka ïing bishar hadien ba la ïoh ïa ka kaiphod RT-PCR bad la pan por ruh na ka ïing bishar 7 sngi ban set ïa u ha byndi ki pulit khnang ban ïoh tohkit bniah ïa u ban tip na kaei ka daw u leh ïa kane ka kam pynhiarkput ba runar ïa la ki khun.
Ha ka jingtohkit ba malu mala ïa u ula phla ba u don ka jingïapher jingmut kaba jur bha hapdeng jongu bad ka kurim jongu. U la phla ba u kwah ban leit phai biang sha ka hynrei ka la kyntait ïa u namar ka kwah ban ïashong khlad beit na ka daw ba u dei uba dih kyiad buaid lynter bad u dei ruh uba dang shu mih na jaka sumar ( rehabilitation centre).
Ngi dang sdang ïa ka jingtohkit bad la sngewthuh ba ka daw ka long ba u bitar ïa ka lok bad pynhiar kput haki khun. Hynrei nalor kane lah ban dang don sa kiwei kiwei ki daw ba ki pulit ka SIT kin dang ïai tohkit ban lap ïaki jingshisha.
