Shillong, Jylliew, 01: Ki nongtrei jong ka Meghalaya Energy Corporation Limited (MeECL) kiba don hapoh ka shatri jong ka Meghalaya Power Worker’s Union ki la phah da ka dorkhas sha u Myntri Rangbah ka Jylla u Conrad Kongkal Sangma ban pynneh beit ïa u Addl. Chief Secretary u Bah Donald P. Wahlang kum u Chairman-cum-Managing Director jong ka MeECL.
Kane ka jingkyrpad jong ka Union ka long hadien ba u Symbud Myntri Rangbah ka Jylla u Bah Prestone Tynsong, uba peit ruh ïa ka tnat Sam Bording dang shen u la kren lyngba ki lad pathai khubor la donkam ban thung noh ïa u Chairman-cum-Managing Director jong ka MeECL uba pura.
“Ka Union ka kwah ban pynpaw ïa ka jingsngewkhia pyrshah ïa ka jingthmu jong ka Sorkar ban wanrah ïa ki jingpynkylla hapoh ka Manangement, khlem da ïasyllok shwa bad ki kynhun bapher bapher kaba lah ban poi haduh u pud ba kan ktah lada ka Sorkar kan shim ïa kane ka rai,” ong ka dorkhas na ka Seng ba la soi da u General Secretary jong ka Meghalaya Power Worker’s Union u Bah R. Majaw.
“Ha kaba ïadei bad kane, ka Union ka kwah ban pyntip ba hapoh ka jingïalam jong u Chairman-cum-Managing Director uba mynta la jan phra bnai kynthih la shem ba u long uba tbit ban weng ïa kiba bun ki jingeh jong ka Corporatoin bad kumjuh ruh ïa ki nongtrei, kata, ban pynkhlaiñ ïa ka jingtreikam jong ka Meghalaya Power Distribution Corporation Limited (MePDCL), ka Meghalaya Power Generation Corporation Limited (MePGCL), ka Meghalaya Power Transmission Corporation Limited (MePTCL), ban siew tista sha ka Sorkar bad sha ki shnat treikam ka Sorkar Pdeng na ka bynta ka jingthied ïa ka bording khnang ban kiar na ka jingpynlip bording, ka jingpyllait ïa ka tulop bad ïa ka penshon, ka jingpyntreikam pura ïa ki skhim bapher bapher kiba dang pyntreikam shaid shaid, ka jingpyllait ïa ka jingsiew pisa sha ki kontraktor bad ïa ki suplaïar bad kiwei kiwei,” la ong ka Union.
“Ka Union, ka sngew ba u CMD uba mynta u dei uba biang tam ban pynjanai ïa ka jingtreikam jong ka Corporation bad ban weng ïa ki jingeh kiba shu sah pongding, dei ruh ban ailad ïa u ba treikam kham bha khanng ban kyntiew shuh shuh ïa ka Corporation, kaba long kawei na tnat treikam ba kongsan hapoh ka Jylla,” la bynrap ka Union.
Ka Union ka la kyrpad ïa ka Sorkar ba kam pat dei satia ban tyrwa ban thung noh da u CMD uba thymmai kumba la pynpaw da u Symbud Myntri Rangbah ha ki lad pathai khubor hynrei ban sngap lem ïa ka jingpynsngew jong ka Union ban pynneh beit ïa u Bah DP Wahlang kum u Chairman-cum-Mananging Director jong ka Corporation bad kiwei de ki tnat treikam uba la lah ban ïarap haduh katta katta ban pynbha ïa ka jingtreikam jong ka MeECL.
“Ka Union ka kyntu ïa ka Sorkar ba ka dei ban sangeh bad ban pyrkhat biang ar sien bad ban ailad ïa u CMD ba mynta jong ka MeECL ba un ai ka kti ka mon ka kti ka diang ban pynbha ïa ka jingtreikam jong ka Corporation,” ong shuh shuh ka Union.
“Ka Union ka shahniah bad ka ngeit ba ka Sorkar kan sngap ïa kane sur jingdawa jong ki nongtrei ka MeECL bad kyrmen ruh ban ym poi haduh u pud ban wanrah ïa kino kino ki jingbym ïasngewthuh jingmut,” ong ka Union ha ka dorkhas.
