Kadei ka jingtieng eit – Kumno ki party ba don ha ka sorkar ki kynthoh ïa ka sorkar

Shillong, Jylliew 01 : Ka jingkynthoh da ki heh ka UDP dang shen ha ka jingïalang jong ka party ha Jowai ka la pynlong ïa u President ka NPP, Dr. WR Kharlukhi ban kynthoh kylla.
Haba kren bad ki lad pathai khubor, u Dr. Kharlukhi u la ong, “Ki party ba don ha ka sorkar ki kynthoh ïa ka sorkar kadei ka jingtieng eit. Haba mynta ha ka jingpynbeit pud ngi ïaleh lang hynrei phin kynnoh ïangi? Nga ju ong ïa ka party ba ngin leh ïa kaei kaba ngi sngewthuh ba kadei kaba bha na bynta u paidbah, da ngi rem ym lei lei namar ngi leh na bynta u paidbah.”
Shuh shuh u ong ruh ba mynta da katei ka ishu kin leit sha u paidbah bad ka shong pat ha ki ban bishar ïa ka jingtreikam jong ki. U ong ruh ba ka shong ruh ha ki la ki kwah ba ka jingpynbeit pud kan neh beit kumjuh khlem poi shaei shaei ruh.
“Ha u Jymmang 2010, mano ba long Myntri Rangbah bad katno ngut ki briew jongngi ki ïap. Hato u Myntri Rangbah ha katei ka por u leit kem ïa kito ki pulit Assam ba siat. Mynta pat ki ong ba balei ban pynbeit ïa u pud u sam katba ha ka por jong ki pat kim nud leh ei ei. Nga ju ong barabor ba ka status quo ka mut ba u Assam u nang kyntur pud bad u Meghalaya pat u nang kynran dien,” la bynrap shuh shuh u Dr. Kharlukhi ba dei ruh u MP jong ka Rajya Sabha.
Shuh shuh u ong ruh ba ka sienjam ba kane ka sorkar ka shim ban pynbeit ïa u pud u sam kadei namar ki kwah ba ka lawei jong ki nongshong shnong ha khappud kan shongsuk shongsaiñ noh bad ba kin ym mad shuh ïa ka lanot kumba ju jia na ka por sha ka por.
Ha kajuh ka por, u Dr. Kharlukhi u la buh jingkylli ruh ïa ka Liang Pyrshah kaba sngap jar pat haba don ki jingjia shah thombor ki nongshong shnong khappud ha kine ki khyndiat por ba la dep.