Shillong, Nailur 11: Ka lympung ïalehkai ‘Big FM’s Big Futsal Fest’ ka la sdang ha ka Sngi Hat Majai ryngkat bad katto katne ki jingïalehkai ba itynnat ba la wan pynshit pynshngaiñ da ki nongpeitkai.
Kane ka lympung ïalehkai futsal na bynta ki ophis treikam ha nongbah Shillong, la wan ïashimbynta da ki kynhun na ki ophis sorkar bapher bapher bad ki kompeni shimet. Ha ka sngi plie la ïadon ryngkatlang u Myntri ka tnat Sports jong ka Sorkar jylla – u Bah Shakliar Warjri.
La ïoh ban pyndep saw tylli ki jingïakhun ha ka Sngi sdang. Ka NEEPCO ka la lah ban pynliem ïa ka ITI Shillong da 7-2, ha kaba u David Kurkalang u la pynkhih haduh saw kol na bynta ka kynhun nongjop.
Ka kynhun AG Meghalaya ka la lah ban pynliem suk ïa ka Banalari Motors da 4-1 kol katba ka MeECL ka la pynjemkhnap ïa ka SP Office, East Khasi Hills da 7-6 kol. Ka PHE Department ka la jop da 7-3 kol ïa ka MUDA.
Haba ai jingkren ha kane ka sngi, na ka liang jong u Bah Shakliar Warjri u la pynpaw ïa ka jingpyrshang jong ka Sokar ban kyntiew ïa ka sports, khamtam ïa ka phutbol (football) lyngba ki prokram Mission Football, bad u la kdew ruh ïa ki jingthmu kum ka Big Futsal Fest kaba ïahap bad ki mat bad ki jingpyrshang jong ka sorkar na bynta ki prokram kiba dang ïaid shakhmat ban kyntiew bad pynroi ïa ka sports hapoh ka jylla.
Ha ka sngi ba bud, phra tylli ki kynhun ki la ïakhun tyngeh ban jam sha ka wat ïakhun quarter final ha ka Big FM’s Big Futsal Fest. Ha ka jingïalehkai ba nyngkong, ka Assembly FC ka la jop ïa ka MBDA da 4-2 kol. U Robert Nongrum u la thep ar kol ban ïarap ïa ka Assembly FC ban rung sha ka quarter. Ka MIMHANS ka la pynkyndit ïa kiba bun hadien ba jop da 6-2 kol ïa ka CNRD Sohïong ha kaba ar ngut ki player, u Brandon Dkhar bad u Sukjingmut Dhar, ki la khyrwit da ka hat trick.
La sakhi ruh ïa ka jingïalehkai kaba jam sha ka penalty, hadien ba ka Water Resources bad ka HQ Defenders ki la ïakhaid da mar 2-2 kol. Ka Department of Water resources ka la lah ban jop da 3-2 ha ka penalty. Ka jingïakhun kaba itynnat tam, ka dei hapdeng ka Meghalaya Secretariat Home Guards pyrshah ïa ka KHADC. Ha kane ka jingïakhun u Fivestar Shylla u la khyrwit haduh 8 kol marwei kaba la ïarap ïa ka kynhun ban jop da 10-2 kol.
Hadien ba la ïaid ar sngi ki jingïakhun, la ïoh ban kynthup lut baroh ki kynhun ban ïakhun ïa ka quarter final. Ka ITI Shillong kan aireng ïa ka AG Meghalaya Futsal Team, katba ka PHE kan ïakynduh bad ka MeECL. Ha ki ar tylli ki quarter final pat, ka MIMHANS kan ïakhun pyrshah ïa ka Assembly FC, katba ka Water Resources kan aireng ïa ka Home Guards. Ka quarterfinal kan long ha ka 12 tarik u Nailur ha Thrive Sports Arena, Lankyrding naduh ka por 12 baje mynsngi.
Haduh 16 tylli ki kynhun kiba ïashimbynta ha kane ka lympung knockout, ba la pynlong ha Langkyrding. Ka final la pynkhreh ban pynlong ha ka 14 tarik mynta u Nailur.
