SHILLONG, Nailur 11: Ka long ka kabu ksiar ïa ki khynnah samla ba dang khie san ban pynpaw ïa ka sap ïalehkai kaba ki don ha kaba kan sa don ka prokram wad sap lane Talent hunt program ba la pynlong hapoh ka Khelo India Rising Talent Hunt (KIRTI-MyBharat) Program ha kaba yn bishar bñiah ïa ka sap jong ki khynnah samla ba dang khie san bad ka lad ban shah pyntbit ha ki jaka ai jinghikai kiba don ha kylleng ka ri India.
Kane ka KIRTI (My-Bharat) bad ka talent hunt program na bynta ki nongïalehkai ha ka thup Athetics bad phutbol (Football) la pynbeit ban pynlong ha Government Boys Higher Secondary School Jowai, West Jaintia Hills District, ha ka 16 tarik bad 17 tarik mynta u Nailur 2024. Ka jingpyntung kyrteng na bynta kane ka talent hunt program kan sdang naduh ka por 9.30 baje mynstep haduh 1 baje mynsngi, bad ka jingbishar bñiah ïa ki sap kan bteng haduh 6 baje janmiet na bynta baroh ar sngi.
Ha kane ka prokram kan don ka jingpeit bñiah ïa ka met ka phad jong u khynnah (Fitness test), ki jingthew ba la pynshong nongrim ha ka jingtbit (Skill based tests) da kaba pyndonkam da ki kor ba la shna kyrpang ban bishar bñiah ïa ka jinglah ki nongïalehkai ha baroh ki rta.
