Dawa ka MPUF-EJHD ïa ka NHAI ban maramot ïa ka surok ha jingkieng Tongseng bad la ai por tang shitaïew

Khliehriat, Jylliew 01: Ka jinglang ka um ha ki bynta jong ka surok kiba la pei thliew khamtam ha jingkieng Tongsneg, Narpuh ka buh jingma haduh katta katta ïa ki paidbah, halor kane ka Meghalaya People’s United Front East Jaiñtia Hillls District lyngba u President, u bah Kyrshan Blah, ka seng ka dawa na ka NHAI bad ka ai por ïa ka National Highway Authority of India ba hapoh ka shitaiew ka dei ban maramot noh ïa katei ka jingpei thliew ka surok ha ka bynta jong ka jingkieng haTongseng Narpuh.
Ka seng ka byrngem ruh ba lada ka NHAI kam lah ban pynurlong ïa ka jingdawa ka seng kan leit ban hiar ban khang tala bad khang khyrdep shi syndon ïa ka jaka khrong khajna jong ka NHAI ha ka Tool Gate Plaza kaba don ha Lumshnong, Narpuh.
U bah Kyrshan Blah, u pynpaw ka jingsngew khia halor ka jinglong jingman ka surokbah national highway khamtam eh ha katei ka bynta ba don ka jingkieng, namar ha kane ka bynta jong ka jingkieng ka um ka lang ha ki jaka ba pei thliew kaba la i kum ka pung bad bunsien ki kali khamtam ki kali rit ki sahkut ha kane ka bynta jong ka surok, ka buh jingeh bad buh jingma ruh ïa ki kali heh kiba kit jingkit bad ym tang katta ka buh jingma ruh ïa ka jingim briew.
U la ong ruh ba ka jingpei thliew ka surok ha jingkieng Tongseng ka buh jingma ruh ïa ka jingkieng namar lada lang palat ka um ka jingkieng ka lah ban jot ban pra ha kano kano ka por bad kan wanrah jingeh kaba khraw ïa ki paidbah kiba iaid lyngba na kane ka surok, ym tang katta, lada jia ba kylla ne lada jia ba sniew kawei ka kali ha katei ka jingkieng khlem pep kan wanrah ïa ka jingdheng kali kaba jur bha ha ka thaiñ Narpuh.
La ong ruh ba ka daw jong ka jinglang um ka dei ruh namar ba ym don ki nala tuid um ha ka jingkieng na kata ka daw ka um ka sahkut ha jingkieng ka wanrah ïaka jingjulor bad pei thliew ka surok.Halor kane ka jingdawa, ka seng kan sa nang iai budien ruh na ki bor synshar district jong ka East Jaiñtia Hills District.