Yn ïashimbynta 2 ngut ki samla sha ka IFMA Muay Thai C’ship ha Thailand
Da ka song tyngka ai jingïarap ka DS Umsawnongkhrai
Nongpoh, Nailur 08: Ka Dorbar Shnong Umsawnongkharai mynta ka sngi ka la pynpaw ïa ka jingsarong kaba khraw ïaki ar ngut ki samla shnong kiba la ioh ban leit shim bynta sha ka IFMA Muay Thai Championship kaba long naduh ka 11 tarik haduh ka 21 tarik u Nailur 2024 ha Thailand. Kine ki samla kiba leit ban mihkhmat na ka shnong Umsawnongkharai ïa ka ri India ki long ka Dasngewtngen Nongrum bad ka Ailin Grace Kharbangar.
Ha ka jingialang kyrpang ban ai ka jingkyrshan bad jingkitbok ia kine ki samla, la don ryngkat u Bah A.Sun, Rangbah Shnong, u Bah Tony Shylla, Secretary Shnong, bad kiwei ki nongialam shnong. Kum shibynta ban pynshlur bad ai mynsiem ia kine ki samla, ka shnong ka la synñiang ruh da ka jingkyrshan pisa ban ïarap ïa ki ha katei ka lympung ha Thailand.
Naka liang u Bah A Sun u ba dei ruh u Coach bad haka juh ka por kum u Rangbah Shnong ka Umsawnongkharai u la pynpaw ka jingsngewkmen ba kitei ki 2 ngut ki samla naka shnong kila ioh ban leit shim bynta shabar ri bad kane ka long ka jingkmen kaba khraw bad kitbok ruh ba u Blei un btin lynti bad sumar ïaki naduh ba ki mih nala iing bad kyrmen ba kitei ki samla kin lah ban lehkai bha ban wanrah ka nam ka burom ïaka shnong, ka jylla bad ka ri baroh kawei.
U Bah Tony Shylla, kum u Secretary Shnong, u la ai ka jingkitbok ïa kine ki samla ba kin ïalehkai bha na ka bynta ban ioh nam jop kaba wanrah ka burom ia ka shnong, ka ri, bad ka jaidbynriew. U la kyntu ruh ia kiwei pat ki samla ba kin bud ia ka nuksa ba bha jong kine kiba don ka mynsiem ban kiew shaphrang ha ka jingim, khamtam ha kiba bun ki sap ba la ai kyrpang u Blei.