Kthong ki Pulit ïa ki runar kiba thang ïa ki kali Pulit ha ki thanat, ong u SP ka EKH
Shillong, Nailur 06: Ki pulit ka jylla ki la rai ban thwet bad ban kthong beit ïa baroh ki runar kiba donkti ban thang ïa ki police station. Ha kine ki sngi ka jylla ka la sakhi ïa ki jingshah thombor ba manla ka por ha ki police station ha une u snem bad kaba dangshen ka dei kaba dang shu jia ha kaba ki runar ki la leit thang ïa ka Rynjah police station.
Katba ka Mawlai police station, Sadar police station bad Laitumkhrah police station ki la dei ki thanat ba mad kine ki jingshah thang ha u bnai Ïaïong haduh u bnai Jymmang.
Haba kylli, u SP ka East Khasi Hills u Bah Sylvester Nongtnger u la ong ba haba ïadei bad ka jingjia shah thang hapoh Rynjah police station, bad ïa kane ka jingjia la dep ban register bad ka jingtohkit halor kane ka dang ïaid da kaba pynthikna, “khlem pep ngin sa ïoh kem ïa kine ki runar”. U la pyntip ba ki pulit ki la shim khia da kaba tyngeh pyrshah ïa kum ki jingjia shah thang ha ki police station.
“Halor ka jingjia ha Laitumkhrah PS, ki runar ki dang don mynta hapoh patok ha kine ki 4-5 bnai,” ong u SP da kaba phah ka khubor kaba khlaiñ, “Kino kino kiba leh ïa ki kam runar, ki pulit kin pynshitom. Ngim lah ban ïohkem ïaphi mynta bad ngin ym lah ban kem ïaphi lashai hynrei manla ka sngi ngin kthong beit nadien jong phi.”
“Kum ki pulit ngi hap ban leh ïa kam jong ngi. Kino kino kiba leh ïa ki kam runar, ngin kthong beit nadien jong ki,” u la bynrap. U Bah Nongtnger u la ong ruh ba ka tnat ka dang pyrkhat ban buh noh da ki CCTV ha baroh ki police station ha kaba kane kadei ka kam kaba hakhmat eh. “Ka kam ba hakhmat eh ka dei ka jingbuh ïa ki CCTV. Da ka jingkyrmen ngin sa lah ban maramot bad ban buh da kiba thymmai,” u la ong.
Haba ïadei pat bad kiwei ki jingkylli, u SP u la ong, “Ka shong ha ki paidbah kumno ki peit ïa ngi hynrei ngin pyndep beit la ki kamram la ka long ha ka kam traffic ne pynïaid kali, ka shongsuk shongsaiñ ne ban ïakhun ïa ki kam runar. Ngi long barabor kiba nyngkong bad kiba khatduh ban jubab. Hynrei don ki por ba ki briew kim ju ïaroh ïa kata bad ki pyrshang beit ban wad daw. Lehse na ka daw jong kane ba ki sa kawang petrol bomb ne ki maw, hynrei na ka liang ki pulit ki la aiti bha halor ka kam.”