Shillong, Nailar 04 : Hadien ba la mih ki jingkynthoh ïa ka jingthmu ban pyndonkam ïa ka madan JN Stadium na bynta ka concert jong u Bryan Adams kaban long ha ka 10tarik uNohprah na ka liang u Myntri Rangbah ka jylla u Conrad K Sangma ha ka sngi Balang u la pynshai ba ka sorkar ka la shim la ka jong ka sienjam halor kane ka bynta.
Haba kren bad ki lad pathai khubor, u Myntri Rangbah u la ong ruh kumba ju leh ha kiwei pat ki jaka, kumjuh kin leh ïa kane ka madan JN stadium da kaba tap bad siang bha ïa katei madan artificial turf da kaba pyndonkam da ki kor ki bor ka juk mynta.
U Myntri Rangbah u la pynthikna ba yn pyndonkam da ki kor ki bor kiba kyrpang, kaba la pyndonkam ha satlak ka pyrthei ha ki madan ïalehkai phutbol bad kriket, na ka bynta ban ïada ïa ka madan ïalehkai ha ka por ba pynlong ïa ki jingïalang paidbah, ki jingïalang ne ki concert.
Katkum ka jingong jong u, da kane ka sienjam yn lah ban ïada ïa utei u phlang ha madan ïalehkai ban lait na kaba shah iuh ne julor na kaba pyndonkam ha katei ka concert.
U la ong ruh ba ka sorkar kan pynthikna ba ki nongpynïaid ïa ka concert kin bud ryntih da kaba pyndonkam da ki kor ki bor ka juk mynta ban ïada na ka jingsniew jong ka madan ïalehkai.
