Ngam lah shah ia kito kiba thmu ban phiah bad pharia ïa ka imlang sahlang : Conrad K Sangma

Shillong, Nailur 02 : U National President ka NPP ba dei ruh u Myntri Rangbah ka Jylla Conrad K Sangma u la ong ba um lah shah satia ban ïohi ïa ki kynhun kiba ka thong jong ki ka long ban phiah arliang ïa ka imlang sahlang.
Ïa kane u Myntri Rangbah u la kren ha ka jingrakhe ïa ka lyngkhuh snem kaba 12 ka jingïaid lynti jong ka party NPP ha ka jylla kaba la wan ban shim bynta da ki nongïalam na ki block bapher bapher ka jylla nalor ki nongïalam ka party ha ka jylla.
Ha kajuh ka por u Conrad u la pynkynmaw ruh ïa ki kyntien jong u nongseng ka party u Purno A Sangma (ba dei ruh u kpa jong u) da kaba ong ba u ju sneng barabor ba ym dei satia ban shah pynbakla lynti ha ka bor pisa haba ïaid ha ka kam shakri paidbah.
“Kaba ngam lah eh ban shah kadei ka jingkynnoh sniew bad ka jingpyrkhat sniew namar kane kan wanrah tang ïa ki maw jynthut hapoh ka imlang sahlang bad ruh ïa ki nongshong shnong,” ong u Conrad haba kren ha katei ka jingïalang.
Kumta, u ong ba ka NPP ka ïeng na ka bynta ban wanrah ka jingïatylli namar ka ngeit ba dei tang ka jingïatylli hapdeng ki nongshong shnong kaba lah ban pyntyllun bad kyntiew ïa ka jylla ha ki liang baroh.
Ha kajuh ka por u ai khublei ruh ïa ki nongïalam ka party kiba la noh synniang shi katdei eh na ka bynta ka jingkiew jong ka party ha ki liang baroh naduh kaba sdang haduh kumba ka long mynta.
“Da ka jingisynei u Blei ngi la don 31ngut ki MLA kaba dei ka sien kaba nyngkong eh hadien u snem 1972 ba ngin don ïa ka jingbun paid (majority),” u la bynrap biang.
U kyntu ruh ïa ki MLA bad ki Myntri Sorkar ba kin pynrung ïa ka mynsiem sngewrit bad sngewnguh ruh ïa u Blei uba la ïalam lynti bad ïohi ïa kaei kaba ki kwah ban leh na ka bynta ka bha ka miat jong ka jylla.
Shuh shuh u ai nuksa ruh kumno u Symbud Myntri Rangbah u shah kren bein u shah kynthoh hynrei u kylla long u Myntri PWD ba nyngkong eh ba lah ban wanrah bun bha ki projek surok ha ka jylla.
“Hato don ba tip ïa kata, ba hapoh ka jingïalam jong u kum u Myntri la lah ban pynïoh bun bha ki surok, bunsien hi ki briew kim ïohi ïa kaba bha,” u la ong.
Hashwa kane la ïoh ruh ïa ka jingkren ba u State President ka party bah Prestone Tynsong ba dei ruh u Symbud Myntri Rangbah nalor kiwei kiwei ki nongïalam jong ka party.