Nongstoiñ, Nailar, 30: Ka kynhun jong ki nongtrei Mistery bad shna Furniture, kaba la tip kum ka All Furniture Asso-ciation West Khasi Hills, lem bad kiwei kiwei ki riew paidbah hapoh ka jingïalam u bah Synsharbor Kharjahrin u ba dei u Lamphang jong ka seng bad u bah Kiew Langrin u Pyndap Phang ka seng, mynta ka sngi ki la leit ban jngoh ïa uwei u samla rangbah u ba la thiah pang mynta la kumba 9 snem kynthih.
Utei u samla u dei u ba la tip kyrteng kum u Donbor Marshra 28 snem ka karta bad u la thiah pang naduh u snem 2014. Haduh mynta la kynjoh kumba 9 snem kynthih ba u la thiah pang hajuh khlem da lah shuh ban khie bad ban ïaid ban ïeng.
La ong ba ka kynhun ka la leit ban jngoh ïa utei u samla ka long kum shibynta ka leh jingisynei ban ai sngew lem kum ka mynsiem para doh para snam. Ïa u synñiang ym dei ba ai tang da ka seng jong ki, hynrei la snohkti lang bad kiwei kiwei ki riew paidbah kiba don mynsiem ka jingsngew lem. Na ka liang ki nongïalam ki la pynpaw ruh ïa ki kyntien sngew lem kyrpang na ka bynta utei u samla.
La ïadonlang ruh ha kane ka jingleit jngoh da u bah Overshilan Sangriang sordar ka shnong Sangriang, ka kong Lila Nongkhar kawei na ki longkmie kaba la paw bha ha ka imlang sahlang ha ka thaiñ Nongstoiñ bad la pynïaid ïa katei ka jingïalang da u Lamphang jong ka seng kum u shongknor.
