U Myntri ka tnat Social Welfare ka Sorkar Jylla u Bah Paul Lyngdoh ha ka sngi Baar u la ai jingtip ha ka Dorbar Synrai jong ka Ingdorbar Thawaiñ ka Jylla ba ki don kumba 3 lak ngut ki nongdih drok ha ka jylla.
Kane ka jingai jingkhein jong u Myntri ka Sorkar Jylla ka la pynieng skhor ïa kiba bun ki longing longsem khamtam eh ïa kito ki kmie ki kpa kiba la ngat ha khohsiew lajong ba ki khun ki la ngop ha u drok uba la pynswai ïa ka jingim jong ki.
Shaei ka lawei jong ki khun samla ha ka kane ka jylla Meghalaya? Kane ka jingai jingkhein jong u Myntri ka tnat Social Welfare ka la pynsuhjer ïa ki paidbah nongshong shnong namarba ka lawei jong kito kiba la im kyrni ban dih ïa u drok ka la long ka lawei kaba dum bad ka bym don shuh ïa ka jingkyrmen. Toi, watla katta, ki dang don ruh ki khun samla kiba kwah ban lait noh na ki kynjri ba la shah teh mraw ha u drok.
Ki paidbah ki sakhi ïa ka jingkhynra jong ki sengbhalang khamtam eh ka Hynñiewtrep Youths Council kaba la trei borbah ban ïakhun thma pyrshah ïa ka jingjyllei jong ki nongdih drok da kaba khynra ha kiba bun ki jaka ha kylleng ka sor Shillong. Ym tang ban shu kem ïa ki nongdih drok hynrei kum ka seng kaba don ruh ïa ka jingkitkhlieh ïa ka imlang ka sahlang, ka ai mynsiem ïa ki samla kiba la ngop ha ka jingim kyrni ha u drok da kaba ïasyllok lang bad ki kmie ki kpa bad ki bahaing hasem ban phah sha ki Rehabilitation Centre khnang ba ki khun samla kin ïoh biang ïa ka jingim kaba thymmai.
Haduh mynta, ka Sorkar kam pat lah satia ban tei ïa ki Rehabilitation Centre ban sumar ïa ki briew kiba la ngop ha ka jingkyrni ban dih ïa u drok. Na ki jingïoh bat jong ki kynhun sengbhalang ïa ki briew kiba la ngop ha u drok la shem ba ki dei ki briew kiba wan na ki longing kiba duk. Lada ym don ki Rehabilitation Centre ba la pynïaid da ka Sorkar kiba lah ban ai jingsumar ha ka jingsiew kaba kham duna, kan buh jingeh ïa ki khun samla kiba la ngop ha u drok namarba ki Rehabilitation Centre ba la pynïaid da ki kynhun bapher bapher hapoh ka jylla ki am ïa ka dor kaba rem.
Ka jingshah ujor ejahar jong u Secretary Shnong ka Nongsohphoh ha kawei ka kynthei bar jylla ba la kynnoh ba ka dei ka snar nongkhaii drok ka la pynieng skhor ïa ki Dorbar Shnong. Ki nongkitkam jong ka Dorbar Shnong Nongsohphoh, ka Dorbar Shnong Them Mawbah ryngkat bad ki nongïalam ka FKJGP bad KSU Mawprem Circle kiba la thaw ïa ka Joint Action Committee ki la kren diaw ïa ka jingtlot bad ka jingluiñ ki bniat jong ka aiñ haba ki nongpynbha ïa ka imlang ka sahlang ki shah khot hajir sha thanat katba ki snar nongkhaii drok kiba la don dak ïong ha manla ki thanat ki ïaid sahuh khlem salia.
Ka jingkylli kaba mih mynta ka long, hato ka jingbuh thong jong ka Sorkar Jylla ban ïakhun thma pyrshah ïa u drok ka long da kano ka lynti haba ïa ki nongkhaii drok kiba la shah kem ki shah set along tang shi miet ar miet ne shi hat shitaiew?
Ka jingkyrduh kam, kam dei satia ka daw ba kin wan kum kine ki jingjia kiba biah phongrai ïa ka imlang ka sahlang hynrei dei ka jingdon jong ki nongkam bymman kiba kwah ban kamai spah da ka kam bymman ban pyntroiñ ïa ka imlang ka sahlang. Ka long kaei kaei kaba sngewsih ban shem katba ki bor jong ka aiñ ki ïohkem ïa ki snar khaii drok, katta ruh u drok u la nang jyllei bad mynta leilei la ïohi syndon ba ki nongkhaïi ki la shalak haduh katta katta ha kaba ki pyrshang ban shu leit pynpoi ïa u mar ha thliew iing (online delivery) jong u nongthied.
Katkum ki jinglap bad ki jingshem, ki khun samla kiba ngop ha ka jingdih drok ka dei na ka jingshah pynngop ha la ki jong ki paralok. Ynda la kyrni, la eh ba kin bthat ia u kynjri uba teh sohkyrdot ia ka jingim. Ki kmie ki kpa, kim dei ban aili than ia ki hun ki kti tang namarba ki kwah ban pynsngewbha ia la ki khun ki kti hynrei ki dei ban pyndonkam ruh ia u dieng sympat bad ka sneng ka khraw khnang ba ki khun ki kti kin dup tip ban jied ia ki paralok ha ka jingim ka jong ki khnang ba kin lait na ka jingtim ha ki sngi ki ban sa wan.
Lada ki seng samla shnong, ki seng kynthei bad ki dorbar shnong kim peitngor bha ïa kine ki nongkhaii drok kiba ïaid laitlan bad ïaid sahuh khlem pep ki khun ki kti jong kiba bun ki longiing longsem kin sa kylla kum ki Zombie kiba don jingim bym treikam shuh ka jabieng.
