Pynkhreh u DHS ban jubab ïa ka’ show cause’bad leh eiei pyrshah ïa ka IIPH

Shillong, Jymmang 30: U Director ka Health Services (MI) Dr Aman War hynne ka sngi nyngkong ula pyntip ba ula pynkhreh ban ai jubab ïa ka show cause notice (jingpan jingpynshai) halor ka jingjia ba 27 tarik Jymmang hapoh ka Campus barim ka NIFT bad pynpaw ruh ba un sa leh eiei ha kine ki sngi ban wan pyrshah ïa ka Indian Institute of Public Health (IIPH), Shillong.
“Nga la ïoh pdiang ïa ka show casue notice hynne ka janmiet bad ngan sa ai ka jubab kumba ka long. Ngan sa leh eiei ruh ha kine ki khyndiat sngi ban wan” ong u Dr Aman haba ïakren bad ki nongthoh khubor.
Une u Heh ka Tnad ka Koit ka Khiah ula pyntip ba ïa kane ka showcause notice la phah da u Principal Secretary ka Tnad u Sampath Kumar uba la pynshong nongrim na ka jingmudui jong ka Director ka IIPH, Shillong ka Sandra Albert.
“Ka jingujor jong ka sha u Principal Secretary ïa kaba la pyndonkam ban ai show cause notice ïa u DHS ka dei ka kam ïa kaba baroh kin sa ïohi bad bishar” ula ong.
Nalor kane, u DHS(MI) ula pynpaw ïa ka jingbym sngewtynnad ba balei u Principal Secretary ula kheiñ kor bad pynksan ïa ka Director ka IIPH ban ïa u Ophisar bala rangbah jong ka Tnad haba ong “Kane kan sa nang paw pyrthei ba kumno ka ïaid ha kine ki khyndiat sngi ban wan”.
Halor ka jingkynnoh ba ‘pyni ïa ka jinglong ba sniew”, u Dr Aman ula ong “Ka Jaidbynriew jong ngi ka dei kaba aijait sha ka Kmie bad i Mei jong nga iba dang im bad dang shait dang khlaiñ da ka jingisynei U Blei, i ju hikai ïa ngi ïa ka akor ka burom naduh ba nga dang rit bad ka jinghiar ïa ka akor ka burom ruh ka wan sha nga bad sha baroh ki para khynnah skul bad khynnah college da ki Nonghikai ba don burom bad nga la long kumne kumba nga long ruh namar ki jinghikai ba nga la ïoh naduh ba nga dang rit”.
“Sa shisien, nga ban jur ba ka jingjia ba jia ha ka 27 tarik Jymmang ha campus barim ka NIFT ha kaba la kynnoh ba nga laleit bad katto katne ki shynrang bad kyndang ïa ki tiar ki tar bad ki miet ki shuki na ka kamra klas ka dei ka ba shu thaw hi, ba thok bad ba leh da ka jingthmu kaba shai kdar ban pynthohbria ïa nga” ula ong.
U Dr Aman ula bynrap “Ka jingong jong ka Director ka IIPH Shillong ka Sandra Albert ba nga la jam palat ïa u pud da kaba leh donbor bad kren tohmet ïa ki samla pule bad nonghikai jong ka Institute ka dei kaba palat liam bad ka dei ban sngewthuh bad nga pyntip ruh sha ka bad ngam donkam ïa ka jinghikai halor ka akor ka burom na ki briew ki ba ngam ithuh bad ba ngam da burom eh”.
U Dr Aman u ong ba ka Director jong ka IIPH kam shym la don satia ha ka jingjia 27 tarik Jymmang bad kala shu kren na ka jingïohsngew pateng bad “nud ban kynnoh ïa kiei kiei baroh pyrshah ïa u Ophisar bala rangbah jong ka Sorkar kata ruh kat ïa u DHS (MI)”.
Lah ban kdew hangne ba ka Ophis u DHS(MI) kala kyndang ïa ka IIPH na campus barim ka NIFT namar ka jing pyndonkam be-aiñ ïa ki kamra ba ka Ophis kala ai sha ka Meghalaya AIDS Control Society khlem da ïoh jingbit.Kane ka jia ruh hadien ba arngut ki Doktor Kynthei ka Meghalaya AIDS Control Society ba kynthup ïa i Project Director bad Deputy Director kila shah kren tohmet bad shah kren khor ha u Registrar ka IIPH.
Ka jaka jong kane ka campus barim ka NIFT ka dei ka nongkynti jong ka Directorate of Health Service (MI) kaba dei khmih ïa baroh ki Medical Institution ha ka Jylla.
Na ka liang u Dr T Jamir, Registrar ka IIPH ula thet kti ia ka jingkynnoh kren tohmet ia ki Doktor ka MACS bad iai kynnoh ba dei u DHS(MI) uba la kren tohmet bad phah mih ia ki samla pule na ki kamra shongklas haba pynshai ruh ba ka IIPH kala pyndonkam ia kine ki kamra ka Campus barim ka NIFT halor ka notification ka sorkar Jylla ba pynmih ha ka 2 tarik Naiwieng 2022 ba ong ba ia ka NIFT Building jong ka NIFT dei ban aiti noh sha ka IIPH.