Shillong, Nailar, 24: Ki nongshong shnong jong ka thaiñ Borghat bad ka Jaiñtia Students Union (JSU) Southern Border Area ki la pynpaw ïa ka jingbitar kaba jur ïa ki bor ba dei peit namar ka jingbym siangrong ïa ka surok ha ka thaiñ Borghat.
“Ïa kane kajuh ka surok ha ka shnong ba marjan ladep siangrong dang shen, hynrei ngim lah ban sngewthuh ba balei ym shym la siang rong ïa kane ka bynta jong ka surok,” la pynpaw ka JSU lyngba u kyrwoh ba la phah da President u Bah Super Lyngdoh.
“Kane ka projek kaba la pyntrei lyngba ka Rehabilitation of Damage Pavement ka kynthup ruh ïa ka jingsiang rong ïa ka surok Rymbai-Borghat-Jalalpur kaba kot T. 23 klur la mang da ka Sorkar kaba leh shiliang khmat ïa kaba la siang rong tang naduh naduh ka shnong Rymbai haduh ka shnong Lakadong, kaba la buh ïa ki nongshong shnong jong ka Borghat ha ka lyngngoh,” ong u kyrwoh na ka seng.
“Ka jingsniew jong ka surok ym tang ba ka pynthud ïa ka leit ka wan hynrei ka buh jingma ruh ïa ki paidbah. Ngi la ïohi ïa kiba bun ki jingjia aksiden kiba la jia na ka daw ka jingsniew jong ka surok, bad ngi sngewkhia lada jia mano mano ba mynsaw lada ym lah ban maramot noh kham kloi ïa ka surok,” la bynrap u kyrwoh.
Ka JSU ka la kyntu ïa ki bor ba dei peit ba kin shimkhia mardor ban maramot noh ïa kane ka surok khnang ban pynsuk ïa ki paidbah ha ka leit ka wan.
“Ngi kyntu ïa ki paidbah nongshong shnong ba kin ïatreilang ban pynbor ïa ka Sorkar ba ka pynstet noh mardor ban shna pynbha ïa ka surok na ka bynta ka bit ka biang jong ki paidbah,” la ong shuh shuh ka JSU.
Ha kajuh ka por u Bah Marshall Biam uwei na ki nongtrei monsngewbha na rilum Jaiñtia u la phah da ka jingthoh sha u Executive Engineer (EE), PWD (Roads) NEC Division, Khliehriat East Jaiñtia Hills District ban ujor halor ka jingsniew jong ka surok naduh ka shnong Lakadong haduh Borkhat Natbor, Pdieng Wahkhriem Demlaang Kwator shaduh ka shnong Hingaria.
“Ha ki khyndiat taiew baladep, ngi la mad ïa ka jinglynshop jong u lapbah uba jur uba la pynjulor ïa ka surok. Ki paidbah ki la ïakynduh jingeh ha ka leit ka wan khamtam ha ka pang ka shitom bad khamtam haba donkam ïa ka jingsumar ba donkam kyrkieh namarba ki surok ki long kiba sniew haduh katta katta kaba lah ban lap wat ka jingduh ei ka mynsiem briew,” ong ka dorkhas. “Ngi la leit pynsngew ha ki bor ba dei peit jong ka tnat PWD ha East Jaiñtia Hills District kiba khmih ïa ka jingshna ïa kane ka surok hynrei haduh mynta kam shym la don kano kano ka jingshimkhia na ka liang jong ki watla bun bunsien la phah ïa ki jingthoh sha ki bor ba dei peit ban maramot ïa ka surok hynrei ka long pynban kumba pynsngew ha ki skhor ba kyllut,” ong u Bah Biam.
“Namarkata, ngi kyntu ïa ka tnat ba dei peit ban shimkhia mardor ban maramot ïa kane ka surok khlem da pynslem shuh hynrei lada ka Sorkar kam sngap, lym kumta yn hap ban shim da kiwei pat ki sienjam ba tyngeh. Ngi kyrpad ïa ka ophis jong phi ban shim ïa kane ka jingujor kum ka kam kaba kyrkieh katba lah namarba ka la ktah shaba palat ïa ka jingim jong ki paidbah,” la bynrap u Bah Marshall Biam.
