Ka jingsiew bailutksan ki karkhana coke ka kiew na ka T10,000 sha ka T51,0000 lak tyngka

Khliehriat jymmang 30: Ka dei myn ha ka 26 tarik mynta u bnai jymmang ba ka tnat MSPCB ka la phah jingthoh bad bthah ïa ki 31 tylli ki karkhana coke ba ki dei ban siew ïa ka bai lut ksan lane ka Environmental Compensation bad ban pynpoi ïa ka pisa sha u Member Secy MSPCB hapoh ka 15 sngi.
La ong ruh ba ka jing siew ïa ka bai lutksan ka la kiew na ka T.10,000 hajar tyngka sha ka T.510000 (sanphew wei Lak tyngka)¸ kane ka jingkiew ka dei kaba katkum ka dor ba la buh kaba na ka daw ka jingpynkheiñ jongki ïa ki kyndon aiñ ïada mariang jong ki karkhana coke kiba pyntrei beaiñ.
Hadien ka hukum jong ka NGT kaba myn ha ka 11 tarik u lber 2022 ha kaba la ai por haduh ar bnai ia ka MSPCB ban pyndep ban bthah ïa ki karkhana coke ba ki dei ban siew khajna kaba tip kum ka Environment Compensation, hynrei ka tnat MSPCB ka khlem leh ïa kane bad hadien kane ka NGT ka la ai por biang ar taiew ban pyndep ïa ki kam kiba katkum ba la pyllait hukum myn ha ka 11 Tarik u lber 2022.
Kumjuh ruh ha ka 27 tarik mynta u bnai ka NGT ka la pynsngew ïa baroh ki mat kiba iadei bad ki jingsiew ïa ka khaja ban iada ïaka mariang (Envoronmental Compensation) khamtam eh ïa kito ki 14 tylli ki Unit ki karkhana kiba la ioh ïa ka CTO, la pynsngew bad mynta yn dang ap ïa ka rai jong ka iïng bishar.
Ha ka 26 tarik ka ECC ka la buh ïa ka jingthoh ha khmat u myntri rangbah ka jylla, kumjuh ruh ha khmat u Chief Secretary ba kin pyllait noh ïa ka hukum ba dei ban shu pynjor pynpra noh ïa kito ki karkhana coke kiba don hajan eh bad ki jaka ba sah ki briew ha shnong.
Katkum ka jingsngewthuh ka ECC ïa ki karkhana ym ju dei ban shah ban tei hajan ki shnong ba shong ba sah ki briew, ka ECC ka kyntu ruh ïa ka sorkar ba kam dei ban ailad ïa kitei ki 14 tylli ki karkhana coke ban pyntreikam bad mynta ki paidbah jong ka elaka Sutnga ki dang ap sa tang ïa ka rai jong ka iïngbishar ha kaba ïadei bad kitei ki 14 tylli ki karkhana coke kiba la ioh ïa ki CTO namar kitei ki 14 tylli ki Unit ki dei ki karkhana kiba pyntrei ha ki jaka ba shong ba sah briew.
La ong ruh ba ka jingtei karkhana jong kitei ki Unit ki dei kiba long pyrshah ïa ka hok jong ki paidbah nongshongshnong ha kaba ki paidbah ka thaiñ kim ioh shuh ban ring mynsiem ïa ka lyer kaba khuid, kaba ong kum ka jingpynkheiñ ïa ka kyndon ba 21 jong ka riti synshar ri bad man la ka por ka iïngbishar Supreme Court ka la ju pyllait ïa ki hum ha kaba ïadei bad ka jingpynneh pynsah ïa ka mariang ka ban pynmih ïa ka lyer kaba khuid.
Ki paidbah jong ka elka ki sngew skhem ba ka rai jingbishar jong ka iing bishar kan long na ka bynta ka jingbit jingbiang ki paidbah.
Katkum ka shithi ujor ba la phah sha u Myntri rangbah ka jylla myn ha ka 24 tarik mynta u bnai jymmang, ka Environment Co-Ordination Committee Elaka Sutnga ka la ujor pyrshah ïa ki 29 tylli ki karkhana coke kiba don hapoh u pud u sam jong ka Elaka, ka ECC ka la pynpaw ba katkum ki kaiphot ba la ioh na ka tnat Meghalaya State Pollution Control Board lyngba kiba lyngba ki RTI ba la dep buh la lap ba ki don haduh 29 tylli ki karkhana kiba la shah kyntait da ki bor ba halor kiba dei peit, kumta halor kane ka ECC ka kwah shuh shuh ba na ka liang u myntri rangbah ka jylla ba un leh ei ei bad ban leh ïa kaba donkam halor kane ban pynmih ïa ka hukum ban shu pynpait pynpra noh shisyndon ïa kitei ki 29 tylli ki karkhana coke.
Katkum ki kaiphot na ka tnat MSPCB la ioh jingtip shuh shuh ba kitei ki karkhana ki pyntrei khlem pat ioh jingbit na ka Board kaba la pynkheiñ ïa ka kyndon aiñ ba 25 kaba ïada ïa ki um ki wah, ki pynkheiñ ïa ki aiñ pynjakhlia mariang (Prevention and Control of Pollution Act 1981, na ka daw ka jing pynkheiñ aiñ jong kitei ki karkhana, ka tnat ka la ai shithi ban khang khydep noh kaba long katkum ki kyndon aiñ 33(A) (Water Prevention and Control of Pollution Act 1981.
Na ka liang ka ECC ha ryngkat lang bad ki Dorbar Shnong ba la mih khmat da ki Waheh Shnong jong ka thaiñ ki buh ka jingkyrpad ïa u myntri rangbah ban leh ei ei bad ban pyllait hukum noh mardor da kaba bthah ïa ki trai kharkhana jong kitei ki 29 tylli ki karkhana coke ba ki dei ban pynpra noh hapoh lai bnai bad lada ym lah ban pyllait kum kata ka hukum u dei ban bthah ïa ki bor synshar District ban pynpra ïa kitei ki 29 tylli ki karkhana coke.