Nongstoiñ, Jymmang 30: Namar ka jingud jingnam jong ki paitbah nongleit nongwan bad ki nongñiah kali, ki nongïalam jong ka Federation of Khasi Jaiñtia & Garo People bad ka Khasi Student Union Nongstoiñ Circle, mynta ka sngi ryngkat ki ophisar ka tnad PWD hadien ba u Kontraktor ki la leit ban jurip bad thew biang ïa ka jingsiang rong ïa ka surok Nongstoiñ haduh Sohpian. Ha katei ka jingleit thew biang ïa katei ka surok, la lap ba ki dang don ki bynta ki bym pat biang ka jingheh katkum ki kyndon ba la bthah da ka sorkar ha ka Detail Project Report.
Ki nongïalam jong ki ar seng haba ïakren bad ki nongthoh khubor, ki la ong ba ki nongïalam jong ki ophisar jong ka PWD ruh ki la kular ba na ka bynta jong kito ki jaka ki bym pat biang kin sa bthah ïa u Jontraktor ba un shna pynbiang. Ha kajuh ka por kitei ki nongïalam sengbhalang, ki la ong ba hadien katto katne por ynda u Kontraktor u la shna biang ïa kito ki bynta ki bym biang, kin hiar ban thew biang bad lada ki lap ba ki dang don ki jaka bym pat biang, kin ym ailad ba un shu iehnoh, hynrei u dei ban pynbiang katkum ki kyndon ba la bthah da ka tnad PWD.
