Shillong, Jymmang 30: Ka Young Boys Football Club ka la ïoh rah ïa ka nam lahduh jong ka lympung ïalehkai Summer Football Tournament 2022 ba pynïaid da ka Wahmawleiñ Social and Cultural Club. Ka Young Boys Football Club ka la ïoh rah ïa kane ka nam lahduh hadien ba ka la pynliem noh da 2-1 kol pyrshah ïa ka Maitshaphrang Club ha ka jingïakhun final kaba la long ha ka sngi Thohdieng jong ka taïew ba lah dep ha Madan Nongshiliang, Jongksha.
Ïa kane ka lympung la wan ban pynhap pyrda noh da ka Dr. Amanda Pakyntein kaba dei ka kurim jong u Myntri ka tnad ïalehkai ka jylla bad MLA ka Mawkynrew Consti-tuency u Bah Banteidor Lyngdoh kaba la long kum ka kongsan.
La ïadonlang ruh u Bah Nobenstar Nonglyer President ka Club Nongshiliang, Kong Clarin Lyngdoh, Bah Shaibor Rani, Bah Biangkam Sohtun uba dei u organiser jong ka tournament, ki dkhot ka Wahmawleiñ Sport Club bad kiwei kiwei ki riew rangbah jong ka thaiñ.
Haba phai sha ka jingïakhun final hapdeng kine ki ar tylli ki team ka jingïakhun ka long kaba ïakhaid bha naduh kaba sdang baroh ar ki la ïakhun tyngeh ban thep kol. Bad dei ka Maitshaphrang Club kaba la plie pyrda nyngkong lyngba ka kol ba la thep da u Meban Rynjah ha ka minit ba 15 jong ka kylla step.
Ka Maitshphrang ka la ïoh ban teh lakam ïa ki jingpyrshang thep kol ka Young Boys FC ha kaba ka la lamkhmat da 1-0 haduh kaba kut jong ka kylla step. Ha ka jingïakhun jong ka kylla miet hadien ka jingïashong jahthait, ka jingïakhun ka la nang shongshit da ka jingwan sakhi ki paidbah nong-kyrshan jong kine ki arliang.
Ka Young Boys ka la ïoh ban bat bad pashat bol bha ha kaba ka la ñion sha ka kut bad pynsmiej katto katne ïa u rangap kol ka Maitshaphrang. Lyngba kane ka rukom ïalehkai, ha ka minit ba 50 u Riwelson Kharsahnoh u la ïoh ban thep ïa ka kol pynïakhaid bad ka kynhun ka la ïoh mynsiem bha bad nang ïakhun tyngeh.
Hapdeng ka jingïakhun kaba ïakhaid bha, bad ha ka jingïalekai ka don beit ka kynhun ba jop bad ba rem, bad ka Yong Boys FC watla ka la shah thep nyngkong pynban ka ïoh ban pynphai sa shi kol lyngba u Tiskhem Kharmylliem ha ka minit ba 55 ha kaba ka kynhun ka la ïoh rah syndon ïa ka nam lahduh jong kane ka lympung ba mynta u snem.
