Shillong , Nailar 22 : U Bah Deimaia L Siangshai President ka Shillong Press Club hynne ka sngi Palei u la pyllait paidbah ïa ka jingrwai jong ka phlim Lyngkar kaba la jer kyrteng ‘Phi Long Ba Janai’.
Ïa kane ka jingrwai la pyllait paidbah ha Shillong Press Club ha ka jingïadonlang u President jong ka Synjuk ki nongshna phlim u Bah Commander Shangpliang, ki nongpynmih phlim, ki tyngshop, ki puron bad ki nongthoh khubor.
Ïa kane ka phlim ba la jer kyrteng ‘Lyngkar’ la shna bad pynmih da u Bah Elegis Thongni uba dei u Director bad Producer bad ki kiba ïashim bynta ki kynthup u samla Welborn Mynsong uba ak kum u tyngshop, ka samla Sanmillian Mawrie bad ka samla Aba Nongkhlaw kum ki puron. Bad ïa katei ka phlim yn sa pyni paidbah noh naduh ka 30 tarik Nailar 2024 ha Bijou Cinema, Shillong.
U Bah Deimaia L Siangshai haba ai jingkren shuwa ban pyllait paidbah ïa kane ka jingrwai u la ai mynsiem ïa ki tyngshop ki puron kiba la ïadon bynta ban ak ha kane ka phlim bad kumjuh ruh ïa u Bah Elegis Thongni uba la shna ïa kane ka phlim.
U la ong ba lyngba kane ka phlim kan long ka jingai jinghikai bad ai jingsneng ruh khamtam ïa ki khun samla ha kaba kum kane ka juk ba mynta. U la kyrkhu kyrdoh ïa kane ka phlim bad kyntu ruh ïa ki paidbah ba kin wan ban ai jingkyrshan da kaba leit ban peit hi da la ki jong ki khmat khnang ba kan long ka jingai mynsiem na ka bynta ki nongpynmih phlim Khasi.
Ha kane ka sngi la ïoh ruh ki jingkren ba u Bah Commander Shangpliang, na u Bah Elegis Thongni, samla Welborn Mynsong bad Sanmillian Mawrie kiba la kyntu ïa ki paidbah ban wan ai jingkyrshan da kaba wan peit ïa kane ka phlim ha Bijou Cinema.
