K a jingpynlong ïa ka lympung ïalehkai Durand Cup ha nongbah Shillong mynta u snem 2024 ka la pynlynguh haduh katta katta ïa ki riewieid phutbol jong ka jylla Meghalaya khamtam ïa ki nongshong shnong ka rilum Khasi bad Jaiñtia kiba la sakhi ïa kane ka jingïakhun kaba itynnat bha hadien ba ar tylli ki kynhun ïalehkai ba pawkhmat na ka jylla Meghalaya ka Rangdajied FC bad ka Shillong Lajong FC ki la pynkhynwin ïa ka JN Complex ha Polo ha kine ki khyndiat sngi bad khamtam eh ha ka jingïakhun ïa ka Quaterfinal hapdeng ka Shillong Lajong FC pyrshah ïa ka East Bengal FC kaba dei ka kynhun radbah na ka nongbah Kolkata, West Bengal.
Ym tang ki samla shynrang kiba ju sngewtynnat bha ban ïalehkai phutbol, hynrei la sakhi ruh ba wat ki heprit ba la synran lang da ki kmie ki kpa haduh ki samla kynthei bad ki rangbah kiba ju ieid bha ïa ka jingïalehkai phutbol ki la pynshlei ïa ka madan JN Complex ban sakhi ïa ka jingïalehkai kaba itynnat bha hapdeng ka Shillong Lajong FC pyrshah ïa ka East Bengal FC ha kaba ka Shillong Lajong FC ka la ïohrung sha ka Semifinal da kaba pynliem noh ïa ka East Bengal FC da 2-1 kol.
Ka jingjop jong ka Shillong Lajong kan sa nang pynskuiñ shuh shuh ïa ki riewieid phutbol ban ïoh sakhi sa ïa ka jingïakhun Semifinal ka ban sa long shen.
Ym lah ban len ba ki samla shynrang bad wat ki samla kynthei haduh ki hep barit ha kane ka jylla ki dei kiba ieid bha ïa ka jingïalehkai phutbol namarba ki ïohi ba ka dei kawei na ki rynsan kaba ki lah ban lait na ki jingmlien kiba sniew khamtam ha kum kane ka juk kaba u drok u la trei borbah ha kane ka jylla khamtam ha sor Shillong.
Ka jingpynlong ïa ka Baby League ha ki snem kiba ladep ka la pynskuiñ bha ïa ki heprit shynrang bad kynthei ban leit wad ïa ki klob ïalehkai na ka bynta ban pyntbit ïalade. Hynrei ka jingwan lynshop jong ka khlam jingpang Covid ka la pynthud noh ïa kane ka lympung ïalehkai kaba ym shym la ïohi shuh ba ki bor ba dei peit kin dang bteng biang ban pynlong ïa ka Baby League kaba la pawnam bha ym tang ha ka Jylla Meghalaya hynrei wat ki lad pathai khubor na dewbah ka ri India ki da wan khnang ban peit ïa ka jingpynlong ïa kane ka lympung ïalehkai jong ki heprit namarba ka jingthmu ka long ban saiñdur ïa ki rang bad ki thei ïalehkai phutbol naduh ka rta kaba dang lung.
Da ka jingmih jong ki klob ïalehkai bapher bapher na kane ka jylla ka la long ruh kum u mawjam ïa kiba bun ki samla ïalehkai phutbol kiba don shisha ïa ka sap kaba tbit kiba la shah thied ha ki klob ïalehkai nabar ka jylla bad kiba la long shisha ki khlur ïalehkai kiba kynsai bad kiba lah ban kamai jakpoh da kane ka kam ïalehkai.
Hynrei haba peit ïa ka jingbym kiew jong ka phutbol ha ka ri India ka dei na ka daw ka jingbym shimkhia jong ki bor sorkar bad ki bor ba dei peit khamtam eh ka All India Football Federation (AIFF) katba ka jingïalehkai kaba kham pawkhmat bha ha ri India ka dei hi ka Kriket. Ka jingkiew jong ka jingïalehkai kriket ha ri India ka la pynmyntoi shikatdei ei ïa ki nongïalehkai kiba ïalehkai ha ki lympung ïalehkai bapher bapher ba la ithuh da ka Board of Control for Cricket in India (BCCI).
Jin lada ka Sorkar India bad ka AIFF ki phaikhmat lem ïa ka jingïalehkai phutbol kumba long ïa ka jingïalehkai Kriket ka ri India kan jin da la sei ïa ka kynhun ïalehkai ka ban mihkhmat ïa ka ri ha ka lympung ïalehkai World Cup ba la bna nam ha ka pyrthei. Watla ka ri India ka don ïa ka jingbunbriew kaba 1 billion ngut hynrei, tang, 20 ngut ruh ym pat lah satia ban sei haduh mynta.
Ka jingkiew bad ka jinghiar jong ki nongïalehkai haduh mynta hi ka dei beit tang da ka jingshimkhia jong ki klob bapawkhmat ha ki jylla bapher bapher jong ka ri India. Toi, watla katta, ngi khmihlynti ba shisien ka sngi ka ri India kan sa lah ban sei ïa ki rangïalehkai ba kynsai na ka ri ban ïoh mihkhmat shisien ka sngi ha ka lympung ïalehkai World Cup.
