19,100 klur bei tyngka ka JICA kum ka ram ban pyntrei ïa ki projek ha Meghalaya bad NE

Shillong , Jymmang 29 : Ka Japan International Cooperation Agency (JICA) ka la bei tyngka kum ka ram haduh 19,100 klur na ka bynta ban pyntreikam ïa ki projek bapher bapher ha kane ka jylla Meghalaya bad ha kiwei ki jylla jong kane ka thaiñ shatei lam mihngi kum ha Assam, Tripura bad Mizoram.
Kine ki projek ki long naduh ki jingpynheh surok, ki hospital bad wat ha ki kam pynneh pynsah mariang ruh kum ka jingpynneh pynsah ïa ki dieng ki siej, ïathuh u Chief Representative jongka JICA ha India u Mitsunori Saito ha ka tnad pathai khubor PTI.
“ Ngi don bun ki projek kiba la pyntreikam ha ki kyrdan bapher bapher ha kane ka thaiñ. Ki don ki projek ba ngi la pyntreikam la kumba san haduh hynriew snem, ki don kiba dang shu sdang thymmai ruh bad ki ban dang shim por ban pyndep” ong u Saito.
Ka JICA ka la ïasoi ïa ka soskular bad ka sorkar India ha u Lber mynta u snem ban ïarap ai ram shuh shuh kumba 2942 klur na ka Japanese Official Development Assistance bad kane kan long beit ha ka jylla Assam kaba ïadei bad ka koit ka khiah.
“ Na kane ka ram ngin ïarap ha kaba pynheh ïa ki hospital bad pynbiang ïa ki kor ki bor bad tiar ai jingsumar ha ki hospital ha Assam. Kaba kum kane ka jingïarap ngin sa tyrwa sha kiwei ki jylla kane ka thaiñ ruh bad wat ban pynneh pynsah ïa ka mariang “ ong u Saito.
Halor ka jingsuki ban pynïaid shakhmat ïa ki projek , u Saito u la ong ba ki don bun ki daw kum ka jingïoh jingbit na ki bor sorkar, ka jingïoh jaka bad bunsien lada slem kine ka shim por ban sdang ïa ka kam bad teng teng ynda la sdang ruh mih bun ki jingpynwit.
U la ïathuh na katei ka 19,100 klur la kynthup ha kaba pynbha bad pynheh ïa ki 14 tylli ki hospital ha Assam, ka jingshna pynheh ïa ki surok ha Meghalaya kum ka Shillong – Dawki, ka jingtei ïa ka Hydro Electrict Power Station ha Meghalaya nangta ha Tripura bad Mizoram.
Ka JICA ka ïarap ruh ban pynneh pynsah ïaki khlaw ki btap, kyntiew ïa ka rep ka riang da kaba pynkhlaiñ ïa ki jingring um sha ki jaka rep jaka riang ha Mizoram.
U la ong ba ka don ka lad bah ban pynkhlaiñ ïa ka khaïi pateng bad ki ri kane ka South Asia bad kumjuh ruh ka India bad ka Bangladesh lyngba kane ka thaiñ shatei lam mihngi.
U la ong lada khlaiñ ka khaïi pateng hapdeng ka India badka Bangladesh kaba kiew bad roi nadong shadong kan long ka thaiñ NE hi baroh kawei. Halor kane u la ong donkam ban pynbha pat ïa ki surok, ki lynti syngkieng kat kum ki kor ki bor kane ka juk ba mynta. Na ka liang ka JICA u Saito u la ong ba kan theh ki jingïarap ban kyntiew ïa kane ka thaiñ ryngkat bad ka jingïatrei lang bad ka sorkar India.