Ban kyntiew ïa ka phutbol, kular ka sorkar ban ai jingïarap da ka song pisa 15 lak sha ki klob

Shillong, Nailar 21: U Myntri ka tnat ïalehkai jong ka Sorkar Jylla – u Bah Shakliar Warjri, ha ka Sngi Balang u la wan sakhi ïa ka jingïalehkai quarter-final hapdeng ka Shillong Lajong FC bad ka East Bengal FC, ba la long ha Jawaharlal Nehru Stadium, Shillong. Shuwa ban sdang kane ka jingïalehkai, na ka liang jong u Myntri ka tnat Sports u la pynbna ïa ka thong bad ki jingthmu jong ka Mission Football 2.0 ka ban sa sdang noh shen.
Haba kren shaphang kane ka Mission Football 2.0, u Bah Shakliar Warjri, u la ong, “Ka Mission Football 2.0 ka thmu ban pynbha bad kyntiew ïa ka Sports naduh tynrai ka ban ïarap kyntiew ruh wat ïa ki khynnah lehkai na kyndong”.
U la pynpaw ruh ïa ka jing seisoh jong ka Mission Football 1.0 da kaba kdew nuksa ïa ki khynnah lehkai kiba la sdang shah pyntbit ha ki grassroot centre bad kiba la ïohlad ban pyni ïa ka sap ha ki rynsan ïalehkai national bad international ba kynthup ïa ka Bonfillia Shullai, ka kynthei ba marwei na Meghalaya ban ïoh mih madan ïa ka kynhun ka ri India ha ka phutbol ha ka U-16 SAFF Women’s Tournament ha Nepal mynta u snem. Ka dei ruh ka symbud kapten jong ka kynhun. U Givenson Suting bad u Samwan A. Lato kiba la shah soi ha ka Bengaluru FC Youth Academy ha u snem 2023 katba ka Sanfida Nongrum bad ka Fragrancy Riwan ki la sdang ban pyntbit ïalade ha Mumbai bad ka Baichung Bhutia Football Schools.
Kumba 16 ngut tam ki khynnah ïalehkai na ki grassroot centre ki la ïoh ban mihkhmat ïa ka Meghalaya ha ki lympung ïalehkai bapher bapher hapoh ka ri (National Football Tournament) ba kynthup ïa ka Khelo India Youth Games, ha kaba ka kynhun U-17 ki la jop takma ksiar ha u snem 2024, u la bynrap.
Shuh shuh, u la pynbna ruh ba ka Mission 2.0, ka jingsiew tulop ïa ki Coach ha ki Grassroots Centre yn pynkylla katkum ka license/certification bad nalor kata, yn phah ïa ki Coach ba kin pyndep ïa ka jingshahhikai ban nang pynroi shuh shuh ïa ka sap hikai jong ki, bad yn pynbiang ruh ïa ki Grant Programs na bynta ki Coach/Support Staff/Referee/Official.
U la ong ruh ba ha kine ki snem ba ladep ki la mih shibun ki klob ha ka thaiñ kiba la plielad ïa ki khynnah lehkai ban pyntbit ïalade, bad na ka liang jong ka Sorkar ka tip shai ba kine ki synjuk ki donkam ïa ka jingkyrshan ban nang pynïar ïa ka rukom treikam jong ki.
Ha kaba ïadei bad kane, na ka liang jong uMyntri ka tnat Sport, u la pynthikna ba ka Sorkar lyngba ka tnat ïalehkai ka la mynjur ban ai jingkyrshan da ka song pisa kaba 15 lak ban ïarap ïa ki klob na kane ka thaiñ, katkum ka jingtyrwa kaba kine ki klob ki pan.
Haba kdew ba ka Meghalaya kum kawei na ki jylla ba ieit phutbol, ka Sorkar lyngba ka Mission Football 2.0 ryngkat bad kiwei dei ki jingthmu kan trei shitom ban nang pynbha bad kyntiew ïa ka Football ha Meghalaya.