Jowai, Jymmang 29: Kawei na ki seng riewlum kaba la rim bha hapoh ka jylla kata ka ‘United Democratic Party’ (UDP) mynta ka sngi Saitjaiñ kala ïoh ban pynskhem ïa ki 29 tylli ki Primary Units jong ka Jowai Circle shi bynta ban pynkhreh ïa ka Election MLA kaba sa long shen ha kane ka snem ban wan 2023.
Ki nongkit jong kitei ki Primary Unit ha kylleng ka sor Jowai kila wan sha kane ka jingïalang kynthup naduh ki President ki Secretary lem bad ki nongkyrshan jong ka Party kaba la long ha ïing Dorbar Hall jong ka shnong Dulong Jowai, ha ka jingïalang ba la pynïaid da u ma Kitboklang Nongtdu President ka Jowai Circle UDP.
Ki nongïalam ba hakhmar eh jong ka Party naduh u Dr. Jemimo Mawthoh General Secretary ka UDP Meghalaya, bah Bindo M. Lanong Chief Adviser UDP Meghalaya, MLA ma Kyrmen Shylla, MLA ma Nujorki Sungoh, u ma Moonlight Pariat President UDP WJHD, MDC ma W.G Sungh, MDC ma Finelyness Bareh, MDC ma Lasky Rymbai, MDC ma Dawan Lyngdoh, ma Michael Saioo Adviser UDP WJHD bad kiwei de kila wan ïadonlang ha kane ka sngi.
Kitei ki nongïalam ka Party haba ai jingkren naduh u Dr. Jemimo Mawthoh ula pynsngew da kaba ong ‘Ka suk ban thied ïa ki nongïalam bad ka eh ban thied ïa ki paidbah’ kumta ka shnong ha phi ki paidbah ban pynlong ïa ka UDP kum ka Team-A ha u snem 2023 ban synshar ïa ka sorkar hapoh ka Jylla.
Ula pynkynmaw ruh ba mynshwa ka UDP ha ka por ba ïasoh bad ka Party Congress ki ong ba ka UDP ka dei ka Team-B bad dei ha ka snem 2013 haduh 2018 kiba la jop haduh 8 ngut ki MLA kila ïeng skhem ha ka liang pyrshah da kaba shah shitom haduh 5 snem, bad naduh ka snem 2018 ka party kala jop 6 ngut ka la don ka sorkar synrop bad ka NPP ban lait na ka jingwan ka synshar President Rule hapoh ka jylla.
‘U kyrmen shkem ha kane ka kynti ka Party kan sa wan jia biang kumba long ha ka snem 1998 ba ka UDP kala pynmih haduh 7 ngut ki Jaiñspong na baroh ki 7 tylli ki Constituency na Jaiñtia Hills kiba mihkhmat kum ki MLA sha ka ïing dorbar thawaiñ ka Jylla.
Kum ki paidbah jong ka Ri-lum Jaiñtia ki dei ban ai ka jingkyrshah pura ïa ka Party kaba la don jingkyrmen bha mynta ka kynti ban ïoh ïa ka jingshynshar.
Ula ong ba ka Congress mynta kala sakma hadien ba la mih ki 12 ngut ki MLA na Party Congress bad ki paidbah mynta ki la phai khmat sha ka Party UDP bad dei ha kane ka nongrim ‘kum ka Party kala dei ban peit bniah bha ha ka rukom ai tiket ïa ki kyrtong kiban ïakhun ïa ka Election 2023’.
Kum ka Party (UDP) kala ïeng skhem na ka jingthmu ban lilam ïa ka tnad MeECL ha ki Company shimet, ula pynshai ruh ba ka Party kala sngewkmen ba ka sorkar mynta ka la shim ïa kane ka jingkitkhlieh ban pyrshang ïa ka pynbeit ïa u pud u sam kaba la sah teng da ki bun bun snem. Da kaba kyntu ruh ha kane ka kynti ba ar jong ka jingpynbeit pud kaba dang sah sa 6 tylli ki jaka khappud dei ban leit khmih bit pa bin khnang ba kitei ki jaka kin lait na ki jingeh.
Na ka liang u bah Bindo M. Lanong ula kren pyrshah ïa ka jingthmu jong ka sorkar kmie hapoh ka jingïalam ka BJP ban pdiang ïa ki lai tylli ki issue kiba ma eh ïa ka jaitbynriew kita ki long kaba nyngkong ka jingthmu ban pynpoi ïa ka ‘Railway’, ba ar ka jingpynrung ïa ka ktien Hindi bad kaba lai ka long ka aiñ ban pynlong ka jingleh survey da kaba pyndonkam da ki Drone na ka bynta ka jylla Meghalaya kumjuh ïa kiwei de ki jylla da ki briew kiba nabar kiba hap ban wan sah da ki phew snem. Ula kren shai ba kane ka long ka jingsdang jong ka jingkut.
Shuh shuh ula pynsngew ba ha ka por ba u dang long kum u myntri ba peit ïa ka Mining naduh 2009-2012 kiba bun ki company ki kwah ban seng ïa ki kharkhana ‘Cook Factory’ hapoh ka jylla bad na ka liang jong u um shem la ai wat tang kawei ka NOC wat hapdeng ka jingjur jong ka jingthong pisa.
Ha ka juh ka por ula pynbna ban ïakhun ïa ka Election ha kane ka snem 2023 na ka Nongkrem Constituency ha kaba un ïakhun bad kiwei de ki kyrtong heh spah da kaba kyntu ïa ki paidbah ban jied ïa ki nongmihkhmat haka nongrim ka hok bad ka jingkyrmen.
