Ki 12 ngut ki MLA ka UDP kin treilang ban pynkhlaiñ ïa ka Party, ong u Bah Lahkmen

Shillong, Nailar 20: U nongïalam ka United Democratic Party (UDP) bad u Myntri barim ka tnat Kam Pohïing ka jylla u Bah Lahkmen Rymbui ha ka sngi baar u la ong ba ki 12 ngut ki nongthaw aiñ kin treilang ban pynkhlaiñ ïa ka seng naduh ki shnong ki thaw ha shwa ka election Assembly 2028.
Kane ka jingkren jong u ka la mih shi sngi hadien ba ki 3 ngut ki MLA ka Congress ki la pynïasoh noh bad ka seng kaba ïalam ïa ka sorkar jylla ka National People’s Party (NPP).
“Ka UDP ka dei ka seng kaba la rim tam bad kadei ka seng riewlum kaba heh tam ha ka jylla. Kumta manla ki party ki pyrshang ban pynkhlaiñ ïa la ki jong ki nongrim bad kin pyrshang ruh ban pynkhlaiñ ïa ka jingdon ki number ha Assembly. Kumta kum ka party, ngi don 12 ngut ki dkhot hapoh ka Assembly kumta ngin pyrshang ruh kumjuh ban pynkhlaiñ ïa la ka party la jong naduh tynrai khnang ban ïohi ha ka election kumno kan long,” ong u Rymbui sha ki lad pathai khubor.
Haba kylli kidei ki sienjam ban shim ban ïada ïa kano kano ka jingpyrshang jong ka jingshah tan ki MLA ka UDP, u MLA ka Amlarem u la ong, “Ngan ym pyndokam ïa ka kyntien ban shah tan naba kino kino kiba pynïasoh bad kano kano ka party jong kiwei ka shong eh ha ka jingsngew jong ki, ka dei ka jingshim bishar jong u naba udei u briew uba bha ban shim ka jingbishar.”
“Na ka bynta ka jong ngi, kumba ka long mynta, ngi don 12 ngut bad ngin neh beit ha ka jingmut jong ka party bad ngin pyrshang ban leh ïa kaba bha tam ym tang ban pynkhlaiñ ïa ka party hynrei ngin pyrshang ruh ban shim jingkheiñ ba balei bun na ki MLA ki pynïasoh sha kiwei ki party, hynrei lada phi kynmaw ha ka samoi treikam kaba la dep ha shwa ka election, ngi don tang khyndiat ki MLA kiba pynïasoh ïa ka party, ngin ym duh jingkyrmen, ngin ïaibteng ban treikam bad ban khring,” u la ong.
U Bah Rymbui u la ong ba ka jingïaleh kaba kongsan hakhmat ka UDP ka dei ban pynkhlaiñ ïa ka nongrim ha thaiñ Garo Hills.
“Hynrei ka kam kaba kongsan na ka bynta jong ngi kumba ka long mynta ka long ban ïoh ka nongrim ha Garo Hills khnang ba ka UDP, kaba dei ka seng riewlum kaba heh, kadei ban long ka party kaba biang ha Meghalaya, hynrei ym kumba long mynta ha kine ki 2-3 tylli ki election ba la leit naba ngi pynleit jingmut beit tang sha ka thaiñ Khasi-Jaiñtia,” u la bynrap.