Shillong, Nailar 16: Kum ka dak jingleh burom kaba khatduh ïa u Myntri Rangbah barim ka Jylla (L) Salseng C Marak, da ka ‘State Funeral’ ha Resubelpara Mini Stadium yn pynlong ka sorkar jylla ha kaba ïadei bad kane ka jingjia kaba sngewsih.
Katkum ka kyrwoh khubor la iathuh ba ki kynrem ki lyndan bad ki heh ki haiñ nalor ki paidbah kin sa ïalum lang ha kane ka madan ban pyndonburom khatduh ïa une u Nongïalam ba la rim ka jylla.
Ka jingleit ontep kan sdang na ka ïingsah u Salseng C Marak na Gajingpara ha ka por 12:05 baje nohphai sngi bad nangne yn rah ïa ka met sha Resubelpara Mini Stadium, ban pynlong ïa ka jingïalang pyndon burom.
La pynbeit ba hadien ka parade, yn pynbud da ka jingïabuh syntiew da ki kynrem ki lyndan bad ki jingkren ban pynkynmaw ïa ki matti une u nongïalam ba la rim bha ka jylla.
Ki nongkren kiban ai jingkren ha kane ka sngi ki kynthup ïa u Marthon J. Sangma, MLA na Mendipathar Constituency, T.D. Shira, MLA na Resubelpara Constituency, bad Saleng A. Sangma, MP ka Tura Parliamentary Constituency. Hadien kane, yn pule ruh ïa ka kyrwoh na u Myntri Rangbah ka Jylla u Conrad K Sangma.
Ïa ka met jong u Salseng C Marak yn tep ha u lum jingtep ka Gajingpara, ong ka kyrwoh khubor na ka sorkar jylla.
