Da ka CCU ba paka ïoh ka Ganesh Das Hospital, shngaiñ kiba kha khun khlem dap bnai

Shillong, Nailar 13 : Ka Ganesh Das Hospital, Lawmali mynta ka la kiew sha ka kyrdan kaba jan ïa ryngkat bad kiwei pat ki hospital kiba paw ha ka Ri hadien ba ka la ïoh ban plie sa ïa ka ‘Babies’ Critical Care Unit lane ka jaka sumar kaba kham kyrpang na bynta kito ki khunlung kiba don jingshitom kaba kham jur kynthup naduh kito kiba dang shu kha.
Lah ban kdew hangne ba man u bnai ki don beit ym duna ïa ka 600 haduh 700 ngut ki longkmie kiba ju wan ban kha khunlung ha katei ka hospital kaba mut ha ka shisngi la kumno kumno kin poi beit 20 ngut.
Ïa kane ka Critical Care Unit kaba don 30 jingthiah la wan ban plie paidbah da u Myntri Rangbah ka Jylla, Conrad K Sangma ryngkat ka Myntri ka Koit ka Khiah, Dr. Ampareen Lyngdoh nalor u Principal Secretary, Commissioner & Secretary, ki Director ka tnad ka Koit ka Khiah kumjuh ka Medical Superintendent ka Ganesh Das Dr. Adreena Lyngdoh nalor kiwei kiwei.
Kane ka jaka sumar ka kynthup ruh ïa ki 6 jingthiah kiba don ïa ki kor ki bor kiba paka ban sumar ïa ki khunlung kiba kha khlem pat dap bnai. Nalor kata kin don ruh 10 jingthiah na bynta ki kmie bad khunlung ba dang kha bad kiba dang rit.
Na ka liang u Myntri Rangbah haba kren ha kane ka sngi u la pynpaw ïa ka jingkmen kaba khraw ban ïohi ïa ka jingkylla kaba la bun bha lada nujor bad u snem 2017 haduh mynta.
“Kam dei eh tang ka jingbei tyngka ne ki tiar kiba lah ban wanrah ïa ka jingkylla hynrei dei ka mynsiem trei jong phi kaba lah ban wanrah shisha ka jingkylla ïa kito kiba phi sumar,” u la ong da kaba ïaroh ruh ïa ki bor pynïaid ka hospital kiba la pyntyllun ïa ka kam hapdeng bun ki jingeh.
Shuh shuh u la ïathuh ruh ba ka sorkar jylla ka la mang bun bha ha ka mangtyngka jong ka sorkar kaba la jan kot sha ka 9persen na ka bynta ka koit ka khiah da ka thong ban pynbha bad pynbiang shuh shuh ïa ki jingdonkam ha ki jaka ai jingsumar.
U Myntri Rangbah u la kular ruh ban pynbiang ïa ki jingdonkam jong katei ka hospital kynthup naduh ki tiar ultrasound nalor ka jingpynbha ïa ka hospital nalor kiwei kiwei.
Katba na ka liang ka Myntri ka la ong ba ki sngewkmen ba ka Ganesh Das ka la kiew mynta sha kawei pat ka kyrdan ha ka rukom ai jingsumar kaba long pat ka jingkyrmen na ka bynta ki longkmie armet kiba shaniah ha katei ka hospital ban wan kha khun.
“Kine ki jaka sumar ba thymmai ha kane ka hospital kin pynbiang ïa ki kynthei kiba armet kiba don ha ka jingma kaba khraw bad ki khunlung kiba dang kha kiba donkam ïa ka jingsumar kaba paka,” ka la ong.
Ha kajuh ka por ka khot ka wer ruh ïa ki doktor kiba pule na ka bhah jong ka sorkar ba kin wanphai biang sha ka jylla ban shakri ha ki jaka sumar jong ka sorkar.
Kane ka dei ka jaka sumar sorkar kaba nyngkong eh ha ka jylla ban don ïa ki SNCU, NICU & MNCU bad ki jingtei kin pynsuk ïa ka hospital ban ai jingsumar hadien ba la kha ïa ki khunlung.
Ha kane ka sngi la pynkup burom ruh ïa ki nongtrei kynthup naduh ki nos bad ki doktor jong ka hospital kiba la aiti met bad mynsiem ha ka jingshakri ïa ka kam.
Na ka liang ka MS jong ka Hospital ka la ai burom ruh ïa baroh ki Medical Superintendent kiba ha shwa bad kumjuh ïa ki nongtrei jong katei ka hospital kiba la noh synñiang ban kyntiew ïa katei ka jaka sumar sha kane ka kyrdan kumba ka long mynta.