Nongstoiñ, Nailar 06: Ki nongïalam ka Hynñiewtrep Youth Council Rimuliang circle hadien ba ka la lap ba bun ki jaka sumar kum ki PHC bad ki Sub Health centre ha ka thaiñ Muliang, ki dang don shibun ki jingduna, ki la leit ban ïakynduh ïa ka District Medical & Health Officer West Khasi Hills ha kamra treikam jong ka, ha kaba ki la aiti ruh ïa ka dorkhast ba katei ka ophisar kan leh ïa kaba donkam.
U samla Distarborlin Wanñiang President ka HYC Rimuliang circle haba ïakren bad ki nongthoh khubor, u la ong ba na ka por sha ka por ki paitbah ki ju ud ba ka don ka jing bym biang ki dawai dashin ha ki jaka sumar. Kumta na ka liang ka seng ka la shimkhia ban leit ïakynduh ïa ka DM&HO, namar ka seng ka la lap ba ki don ki kyrteng dawai kiba dei ban pynpoi ha ki PHC bad ki Sub health centre hynrei ki dawai kim shym la poi satia.
Utei u nongïalam ka seng u la ong ruh ba ha ka jingïakynduh jong ki ïa ka DM&HO, ki la pynsngew ruh ha kaba ïadei bad ka jingjia ha Aradonga PHC ha ki bnai ba la dep, ba ka la don ka jingïakynad bad ka jingbym sngewthuh jingmut hapdeng ki nongtrei bad ki paitbah, kaba la poi sha ka jingiania, hynrei hadien pat ki la poi sha ka jingïangewthuh jingmut.
Wat la katta ruh ka seng ka la pynsngew ha katei ka ophisar ïa katei ka mat ha katei ka ophisar, ba kan shimkhia halor katei ka jingjia. Ha kajuh ka por u la ong ba ki la pynsngew ruh ha kaba ïadei bad ka Sub health cntre kaba don ha Langpih namar naduh ba la dep tei ym pat pyntreikam satia.
Kumta halor ka jingpynsngew jong ki, ka DM&HO ka la ong ba ka la dep pyntip sha u Director jong ka tnad ka koit ka khiah ha Shillong bad shen ka sorkar kan sa phah noh ïa ki nongtrei ha katei ka Sub Health centre ha Langpih.
