Shillong, Nailar 05: Ka Seng Hynñiewtrep Youth Council (HYC) Mawphlang MAwsynram Zone ka la pynpaw ba ka ai jingkyrshan kaba ratbah ïa ka Dorbar Shnong Mawsynram kaba la kyntait ban ai jingbit ïa ki kynhun Niam Hindu kiba la thmu ban pynlong ïa ki jingduwai jong ki hapoh ka Krem Mawjymbuiñ kaba ki la buh ban ïaid kjat naduh ka 10 haduh ka 11 tarik mynta u bnai.
Na ka liang jong ka seng ka la ong ba ha ka jingleit jurip ha kane ka sngi ka seng ka la lap ba ki don bun ki jakhlia kum ki syntiew, ki khiew khyndew barit ba ki la bret bad buhrieh hapoh ka krem Mawjymbuiñ.
Shuh shuh na ka liang ka seng ka la lap ruh ïa ka dud, ka umphniang kaba la lyngkien ha madan ha kine ki sngi. Kumta na ka liang ka seng ka la pynpaw ba kine ki jingleh ki long thik kum ka jingpynjaboh ïa kane ka krem. Kumta ha kaba ïadei bad kane na ka liang ka seng ka ai jingkyrshan kaba pura ïa ka Dorbar Shnong Mawsynram kaba la shim ïa kane ka sienjam ban ym ai jingbit ban leh niam ha kane ka jaka kaba dei ruh ka jaka kaba ri la sumar da ka Dorbar Shnong naduh hyndai hynthai, ong ka kyrwoh ba la phah da u Vice President ka HYC Mawphlang Mawsynram Zone u Bah Lodestar Syiemlieh.
