Jop i Phibansankyrhai bad i Helpborndaia ha ka jingïakop rwai sur tynrai ka KSU
Mawkyrwat, ‘Nailar 02: Ka Khasi Student’s Union (KSU) jong ka Mawkyrwat Circle Girls’ Wing kum shibynta ban ai mynsiem bad pynshlur ïa ki samla bad ki hep kiba rit ba kin lah ban ïeng ha ki rynsan ïakop, ka la pynlong da ka jingïakop rwai sur tynrai kaba ki la ai kyrteng ka “Maitshaphrang Solo Singing Competition 2024” ha Community Hall, Mawkyrwat, South West Khasi Hills District.
Kane ka jingïakop ka long da ka jingthmu bad jingmut ban rah lane ban kyntiew lem ïa ki nongrwai la ka long ïa ki samla ne ki heprit kiba ieid jingrwai kin long sngewshlur, bad kin nym pynleh-noh-ei ïa ki sap kaba ki don hynrei ba kin ïoh ka lad ban pynpaw ha kane ka rynsan ïakop bad ban ïai kynmaw ruh ïa la ka ktien bad pynneh pynsah ïa la ki sur kynud lajong.
Shuh shuh lah ban ong ym lah ban len ba napoh ka dong ka thaiñ jong ngi, ki don shibun ki samla donsap kiba paw ha ka rwai ka siaw, ka put ka tem, hynrei ïa kita ki sap ki phong ba ki don bun ki bym nud ban pynpaw ne kim ïoh ïa ka lad kaba biang ban pynpaw.
Ha kane ka jingïakop, la phiah ha ar tylli ki kyrdan kata ka long kiba shapoh ka karta ba 14 snem bad 14 snem sha jrong ha kaba u bah Kitborlang Nongrem ula long kum u kongsan bad bah Elevenson Wanniang ula long kum u symbud kongsan.
Ki nongjop ha kane ka lympung ïakop rwai tynrai ka “Maitshaphaphrang Solo Singing Competition” ba la pynlong da ka KSU Mawkyrwat Circle Girls’ Wing ki long: kiba hapoh ïa ka 14 snem la rah da i Phibansankyrhai Ramsiej, ba ar i Daphishisha Lyngdoh Marshillong bad ba lai i Phibawanshwa Thongni kumjuh ruh ki ar tylli ki Consolation kata i Daphinylla Kharhari bad i Susan Lyngdoh Sangriang.
Nangta, ki nongjop ha ka karta ba 14 snem sha jrong ki long i Helpborndaia Lyngkhoi, ba ar i Sukda-shisha Lyngkhoi bad ba lai i Relisha Snaitang, katba ha ka Consolation dei i Plandarsing Turnia bad i Laweisukjai Wahlang.
Kiwei de kiba la ïadon lang ki long u bah Jiedskhem Nongsiej, General Secretary ka KSU South West Khasi Hills District, lem bad ki nongïalam na ka KSU Mawkyrwat Circle, u Myntri Shnong ka Mawkyrwat.