Shillong, Naitung 31: Ka Laitumkhrah SC bad ka Madan SCC ki la long ki kynhun ba khadduh ban jam sha ka wat ïakhun Quarterfinal ha ka lympung kyrdan ïalehkai U-20 Fourth Division 2024 ba la pynïaid da ka Shillong Sports Association, bad kane la pynthikna hadien ba ki la khur jingjop ha ki jingïakhun ïa ka Pre Quarter final ha SSA Stadium, Polo.
Ka Laitumkhrah ka la pynliem ïa ka Diengpasoh SC lyngba ka tie breaker da 5-3 naba ïakhaid ha ka jingïakhun.
Nangta ka jingïakhun kaba bud, la sakhi ïa ka Madan SCC kaba la pynjemkhnap ïa ka Mawpdang SC, da 3-0 kol. U Wankmen Lyngdoh u la thep nyngkong ha ka 13 minit, nangta ka bud sa na u Phermanbha Lyngdoh (69 minit) bad khadduh na u Anderson Nongkynrih (70’+1 minit) .
Mynta ka sngi kin don ar tylli ki jingïalehkai, kawei ha ka kyrdan 3rd Division, hapdeng ka Iatyllilang SC pyrshah ïa ka Umlyngka SC, por 1 baje mynsngi, nangta bud sa ka Quarter final jong ka 4th Division hapdeng ka Umrynjah SC bad ka Laitkroh SC, ha ka por 3:45 baje, ha SSA Stadium, Polo.
