3rd Division: Jop ka Newhill, Madan Thadmuthlong, Mookymphad bad Dongneiñ Mookaswan

Jowai, Naitung 31: Ki jingïalehkai ka lympung phutbol bala tip kum ka “4th U Adelbert Laloo Memorial Trophy” jong ka kyrdan 3rd Division Football Tournament 2024 bala pynïaid da ka West Jaiñtia District Sports Association (WJDSA) Jowai kaba la long ha ka Sngi Hat Majai (30 tarik Naitung) ha madan Kiang Nangbah Stadium Dongmihsngi, Jowai.
Ka jingïakhun ba nyngkong la sakhi ïa ka Newhill kaba la pynliem da 3-0 kol ïa ka Moodymmai, bad ka nam ka long sha u Samson Swer u ba la khyrwit ïa baroh lai tylli ki kol ban kynjoh hat trick (9, 30, & 51 minit).
Ka jingïakhun kaba ar la sakhi ïa ka Madan Thadmuthlong kaba la pynliem da 3-1 kol ïa ka FAM. Ki lai kol na ka Madan Thadmuthlong la thep da u Pynïaid Tang tang hadien 1 minit, u Precious Tang (55 min) bad u Womhasa Suchiang (70 minit). Na bynta ka FAM la thep da u Yoohimi oo tre Patweth ha ka minit ba 30.
Nangta ka jingïakhun kaba lai, ka Mookymphad Mihmyntdu kala pynliem kput da 4-0 kol ïa ka Lumïongkajam, ha kaba u Becousemi Shylla u la khyrwit da hat trick syndon (13, 16 & 44 minit) katba ka shi kol la wan na u Dapyrkhat Suchiang (69 minit).
Ha ka jingïakhun ba khadduh, ka Dongneiñ Mookaswan kala pynliem noh da 2-0 kol ïa ka Umchangiar. Kine ki kol la thep da u Lastborn Phawa ha ka 13 minit bud sa na u Ksaid Shylla haka minit ba 67.