Shillong, Naitung 29: Ka Raj Bhavan ha ka sngi nyngkong ka la pynlong ïa ka prokram ai khublei ïa u Lat ka jylla Meghalaya, u Phagu Chauhan, katba u dang pynkhreh ban mihnoh na kane ka jylla bad na ki kam ba u la trei ha kane ka jylla. Ha kane ka prokram la shim bynta da ki officer bad ki nongtrei ka Raj Bhavan, Shillong, kiba la lumlang ban pynpaw ïa ka jingïaroh bad ai khublei ïa u Lat.
Ha ka jingkren jong u, U lat u la ai khublei ïa ki nongtrei ka Raj Bhavan ba ki la ai ka jingkyrshan kaba khlem shongthait bad kiba la aiti met ba mynsiem ha ka samoi treikam jong u.
Ha kane ka sngi ki heh jong ki tnat bapher bapher ha Raj Bhavan ki la ai ki jingkren ban pynpaw ka jingïaroh kaba naduh mynsiem halor ki jingïalam jong u bad ki jingnoh synniang ha ka por ba u dang long u Lat ka jylla.
La don ka jingkren ban pynkynmaw ïa ki kam jong u kum u Lat ka jylla bad la aiti ruh ïa ki jingai sngewbha kaba long kum ka dak ka burom halor ki kam shakri ïa ka jylla.
Ki kam ba la jop ha ka por samoi treikam jong u ka kynthup ïa ka jingthung bad pynïeng ïa u Mawbynna shabar ka main gate jong ka Raj Bhavan ha ka por ba dap 150th anniversary jong ka Raj Bhavan. Nangta ka jingwan shim bynta u Myntri Rangbah duh ka ri u Narendra Modi ha ka sngi bam smai u Myntri Rangbah ka jylla u Conrad K. Sangma bad ka kynhun myntri sorkar jong u. Ha ka samoi treikam la sakhi ruh ïa ka jingwan jngoh President ka ri India, bad nalor kiwei kiba la jia ha ka por samoi treikam jong u.
