Shillong, Naitung 18 : Khasi Hills Autonomous District Council (KHADC) ha ka hukum ba pynmih ha ka sngi Palei ka la ong ba la pynsangeh (put on hold) ïa ka hukum ba pynmih da ka Executive Committee lane ka Executive Committee Order kaba ïadei bad ka Raid Majai, Sohra Syiemship kaba la pynmih ha ka 21tarik Jylliew, 2024.
Katkum ka tei ka hukum ba pynmih da ka KHADC ha kane ka sngi Palei, la ong ba ki la don bun ki jingujor kiba ka Council ka ïoh pdiang haba ïadei bad ka Raid Majai, Sohra Syiemship. Kumta, la ong ba ïa kane ka kam la pynsangeh shwa khnang ban ïoh khmih bniah biang.
Ha kane ka janmiet, ka kynhun jong Ki Khun ki Hajar Hima Sohra ki la kynduh ïa u Deputy CEM, Bah PN Syiem ha kaba la pyntip ïa ki halor katei ka hukum ba ka Council ka la dep ban pynmih.
Shwa kane, na ka liang u Nongïalam ka Liang Pyrshah Bah Titos W Chyne ryngkat bad katei ka kynhun jong ka Hima Sohra ki la pynpaw ba kim lah satia ban pdiang ïa ka rai jong ka Council ban ithuh ïa ka Majai kum ka Raid.
Hynrei hadien ka jingïakynduh ïa u Deputy CEM, u nongïalam ka kynhun, Bah M Bynnud u la pynpaw ba ki la hun halor ka jingpynbna kaba thymmai kaba ki ïoh ha katei ka janmiet na u Deputy CEM.
