Rah nam lahduh ka Hill and YS&CC bad ka Nonglang SC ha ka 1st MMC (Invitational) 2022 ha Mawkyrwat
Mawkyrwat, Jymmang 27: Ka Hilland Youth Sports & Cultural Club jong ki kynthei bad ka Nonglang Sports Club jong ki shynrang ki la long ki ar kynhun kiba la rah ïa ka nam lahduh ha ka lympung ïalehkai jong ka 1st Mawkyrwat Mawpoiñ Competition (Invitational) 2022 ba la pynlong ha madan jong ka MDSA Mawkyrwat.
Ïa kane ka lympung ïalehkai la pynïaid da ka ophis jong u District Sports Officer, South West Khasi Hills District ha ryngkat ka jingïatreilang bad ka District Administration, South West Khasi Hills District kaba long kum shibynta jong ka jingrakhe ïa ka jingdap 50 snem jong ka jingïoh ïa ka jylla ba pura bad ka jingdap 75 snem jong ka jingïoh jinglaitluid jong ka Ri India.
Ha ka jingïakhun phainal kaba dei jong ki khynnah kynthei ka Hilland Youth Sports & Cultural Club ka la ïa khun pyrshah ïa ka Rangthong Sports Club ha kaba ka Hilland YS & CC ka la jop da 40 – 28 poiñ. Katba ki khynnah shynrang pat ka Nonglang Sports Club ka la pynliem noh da 48 – 43 poiñ pyrshah ïa ka Mawten Sports Club.
Ha kaba kut jong ka jingïalehkai la ïoh ruh ban sam ïa ki khusnam sha baroh saw tylli ki kynhun kiba la poi sha ka thong jong ka jingjop bad kumjuh ruh sha ki kynhun kiba la shah rem noh.
Haba kren ha ka jingïalang kaba lyngkot, ka kong J.U. Kharpuri, MCS, ADC, South West Khasi Hills District kaba long kum ka kongsan ha kane ka sngi pynhap pyrda ïa kane ka 1st Mawkyrwat Mawpoiñ Competition (Invitational) 2022 ka la pynpaw ka jingaikhublei na ka bynta baroh ki nongïashimbynta kiba la poi sha kane ka wat kaba khadduh ba kynthup ïa ki shynrang bad kynthei. Ka la ong ruh ba ha ka jingïakhun kan don beit kaba jop bad ka ban rem, hynrei kaba jop ka dei ban ïai ïa khun tyngeh ban poi sha ki kyrdan kiba kham shakhmat bad kiba rem ruh kim dei ban duh mynsiem pynban ki dei ban dang ïai ïa khun ha kiwei pat ki por da kaba long ki khynnah ki ban ïai kilanmet.
Ka la ong ruh haba don kum kine ki jaid jingïalehkai kan long kawei na ki lad ban pynïoh ha ki ïa ka met kaba koit kaba khiah namar haba don ha madan ki ïoh ban khih ban ksar ïa ka met ka phad. Ha kajuh ka por ka long pynpaw ruh ba ka jingwan shakhmat jong ki khynnah samla synrang bad kynthei ban ïashimbynta ha kane ka lympung ka la shisha ka lympung kaba jop watla ka dang long ha ka sien kaba nyngkong.
Kiba ïa don lang ha kane ka sngi ki long u bah Steveford Marweiñ, MCS, EAC, South West Khasi Hills District, u bah Lastborn Marthong, MCS, EAC, South West Khasi Hills District, u bah Damang Syngkon, District Sports Officer, South West Khasi Hills District, ki nonghikai, ki kmie ki kpa lem bad kiwei kiwei.