Ha rilum Garo ka jingdon kiba pass SSLC kam ju tam ïa ka 40 persen : Education Minister

Shillong, Naitung 17 : U Myntri ka tnad Pule Puthi ka sorkar jylla, u Rakkam A Sangma u la pynpaw ïa ka jingsgewkhia halor ka jingduna palat ki samla na rilum Garo kiba pass bha ha ka eksam Matrik ne Secondary School Leaving Certificate (SSLC) ha kine ki san snem.
Haba kren bad ki lad pathai khubor, u Myntri u la ong ba ka sorkar jylla ka la shim shibun ki sienjam bad ki jingïarap la ka long ka jingpynkylla ïa ka kot pule bad ka jingtei ïa ki ïing skul bad ka jingpynthymmai ïa baroh ki ïing skul.
“Ngam don kano kano ka kaiphod kaba thikna bad nga hynrei kane ka dei ka jingeh kaba la don naduh mynshwa ha ngi tangba kane ka sorkar ka shim ki lad ki lynti ban pynbha ïa ka kyrdan jong ka PGI bad ki lad ki lynti bapher bapher kiba ngi thmu ban shim ban pynhiar ïa ka jingduhnong ha ka jylla.
Shuh shuh u la ong ruh ba katkum ka Performance Grading Index (PGI), ki don bun kiei kiei kiba ïadei bad ka jingphiah kyrdan la ka long ha ka rukom hikai, ki ïing skul, ki kot pule bad kiwei kiwei.
“Ka jingpep skul shiteng por khamtam ha ki bynta jong ka rilum Garo, lada phi peit ïa ka result jong ka SSLC ha kine ki san snem ba la dep kam pat ju tam ïa ka 40 percent person barabor ka neh beit tang 37 persen. Kane ka dei ka jingjia kaba i ma bad kaba sngewkhia bha. Mynta ngi la lap ba ki don ar ne lai tylli ki distrik kiba khlem lah satia ban leh bha Na kata ka daw ngi kwah ban shimkhia ban kyntiew ïa ka jinglah jong ki,” u la ong.
Shuh shuh u ong ba kine ki kynthup ïa ka South West Garo Hills bad ka East Garo Hills. “Nga ngeit ba jan baroh ki distrik jong ka rilum Garo ka ktah lut naba ka jingpass ka neh tang 37 persen ha ki san snem. Kane kadei kaba jia hangne.”
Nalorkata, u ong ruh ba ki don shibun ki daw kiba pynlong ïa ki khynnah ban pep skul shiteng por. Katkum ka jingong jong u, ki daw ki lah ban dei na ka jinglong ki nonghikai, kawei pat ka lah ban dei ba jngai palat ka skul bad ruh ka jingbym don ki higher secondary school hajan nalor kiba bun kiwei kiwei pat ki daw.
Kumta halor kane u la ong, “Ha ka tnad ngi dang bishar bniah bad ngi dang shim ïa ka kaiphod bad ngi la bthah ruh wat ïa ki Deputy Commissioner ban leit jurip bad ban ïakynduh ïa kum kitei ki skul naba don ki skul kiba ka jingtreikam jong ki ka long beit nod.”
U ong ruh ba don ki skul kiba leh bha ha nongkyndong hynrei don pat kiba ka jingtreikam jong ki ka long beit nod.
“Ha South Garo Hills, ki don bun ki skul kiba lah ban leh bha. Ha Constituency jongnga ki don kumba 7-8 tylli ki skul bad na kine 5-6 tylli ka jingpass jong ki ka long beit 100 persen hynrei ki don pat ar ne lai tylli kaba long hapoh 20 persen.
Shuh shuh u ong ba lada nujor ka jingpass ki samla ha East Khasi Hills ka long 71 persen bad ka East Jaintia kadei kawei pat ka distrik kaba leh bha.