Shillong, Naitung 16 : Ka skulbah North-Eastern Hill University (NEHU) ka pynbna ïa ka jingsdang jong ka jingpynrung kyrteng ïa ki jingpule bapher bapher jong ka Postgraduate (PG) na ka bynta kane ka aiom pule kaban sa wan.
Katkum ka kyrwoh la ong ba mynta u snem ki jingpdiang ki la sdang kham kloi haba ïa nujor bad ki ar snem ba la dep, kaba pyni ïa ka jingtreishitom jong ka skulbah ban pynbha ïa ka rukom pule bad ban pynthikna ïa ka jingsdang kaba biang por ïa ka por pule kaba thymmai.
La kyntu ïa ki samla pule kiba kwah ban pule ba kin leit sha ka website jong ka NEHU ha nehu.ac.in ban pyndap ïa ki phom ban rung bad ban pynskhem ïa ka jaka jong ki ha kawei na ki prokram ba pawnam jong ka skulbah NEHU. Ka skulbah ka thmu ban pyndep kloi ïa ka jingpynrung kyrteng, kaba ailad ïa ki samla pule bad ki nonghikai ban pynkhreh bha na ka bynta u snem pule ba thymmai.
Nalor ki jingpule PG, shen ka NEHU kan sa pynmih ïa ka jingpynbna ha kaba ïadei bad ka Integrated Teacher Education Program (ITEP). Kane ka jingthmu kaban sa wan ka ïadei bad ka jingkular jong ka NEHU ban ai ïa ki lynti pule kiba bniah bad kiba ïadei lang na ka bynta ki nonghikai kiba kwah ban long nonghikai, kaba pynkhreh ïa ki ban nang ban leh bha ha ki kam jong ki ha ka lawei.
